މިއީ ޕާޓީ އެކަތިގަނޑެއްގެ ގޮތުގައި އޮވެ މަސައްކަތް ކޮށްގެން ލިބުނު ކާމިޔާބީއެއް: ފައްޔާޒް

ލޯކަލް ކައުންސިލް އިންތިޚާބުގައި ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ) އަށް ލިބުނު ބޮޑު ކާމިޔާބީއަކީ، ޕާޓީގެ މެންބަރުން އެކަތިގަނޑެއްގެ ގޮތުގައި މަސައްކަތް ކުރުމުގެ ނަތީޖާކަމަށް އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއިލް ވިދާޅުވެއްޖެއެވެ.

ފައްޔާޒް ވިދާޅުވީ މި ނަތީޖާއަކީ މިހާރުގެ ސަރުކާރަށް ރައްޔިތުން ދެއްވި ސާފު ޖަވާބެއް ކަމަށެވެ.

އެކްސްގައި ކުރެއްވި ޕޯސްޓެއްގައި ފައްޔާޒް ވިދާޅުވީ، މި އިންތިޚާބުގައި ޕާޓީގެ މެންބަރުންނާއި، އެތަކެއް އާންމު ރައްޔިތުންނެއް ދެއްކެވީ އާދަޔާ ހިލާފު ގަދަ ހިތްވަރެއް ކަމަށެވެ. އަދި ގާނޫނުއަސާސީގެ ހިމާޔަތުގައާއި، ޑިމޮކްރަސީގެ ދިފާއުގައި ދިވެހިން ތިބޭނެކަން މި ނަތީޖާއިން ސާބިތުކޮށްދީފައިވާ ކަމަށް އޭނާ ފާހަގަކުރެއްވިއެވެ.

”ފެންނަ ނުފެންނަ ވޯޓުގައި 70 ޕަސެންޓުން މި ސަރުކާރަށް ރައްޔިތުން ނޫނެކޭ ބުނެފި“

ގާނޫނުއަސާސީއަށް އިތުރު ބަދަލުތަކެއް ގެނައުމުގެ މެންޑޭޓެއް މިހާރު މި ސަރުކާރުގައި ނެތް ކަމަށް ފައްޔާޒް ވިދާޅުވިއެވެ. ނަމަވެސް، މިހާރު ގެނެސްފައި ހުރި ބަދަލުތައް އަނބުރާ ގެންދަން ޖެހޭ ކަމަށާއި، ދައުލަތް ހިންގުމުގެ އޮނިގަނޑަށް ބޮޑެތި އިސްލާހީ ބަދަލުތަކެއް ގެންނަން ޖެހޭކަން ގަބޫލުކުރައްވާ ކަމަށް ވެސް އޭނާ ވިދާޅުވިއެވެ.

ފައްޔާޒް އިތުރަށް ވިދާޅުވީ، ރައީސް ޑރ. މުޙައްމަދު މުޢިއްޒުގެ ސަރުކާރަށް ނޫނެކޭ ބުނެ ރައްޔިތުން އެމްޑީޕީއާ ކައުންސިލްތައް ހަވާލުކުރީ އެ ޕާޓީއާ މެދު އުންމީދެއް އޮތުމުން ކަމަށެވެ. އަދި މިއީ ރައްޔިތުންގެ އިތުބާރު ހޯދަން ލިބުނު ފުރުސަތެއް ކަމަށާއި، ރައްޔިތުން ދިން އުންމީދުގެ ހުޅުކޮޅު ނިވުނަނުދީ ރޯކުރުމަކީ ޕާޓީގެ މައްޗަށް އޮތް ބޮޑު ޒިންމާއެއް ކަމަށް އޭނާ ވިދާޅުވިއެވެ.

އިސްލާހީ މަސައްކަތަކީ އަބަދުވެސް ކުރަން ޖެހޭ މަސައްކަތެއްކަން ފާހަގަކުރައްވަމުން ފައްޔާޒް ވިދާޅުވީ، ދައުލަތް ހިންގުމުގެ ނިޒާމަށް ގެންނަން ބޭނުންވާ ބަދަލުތަކުގެ ކަރުދާހަކާއެކު ކުރިއަށް އޮތް ތަނުގައި ރައްޔިތުންނާ ހަމައަށް ދާނެ ކަމަށެވެ.