ތަފާތު ޖީލުތަކުގެ ފިރިހެނުން އަޅާކިޔައިގެން ހަދާފައިވާ ތަފާސްހިސާބުތަކުން ދައްކާގޮތުގައި، 1980 ގެ އަހަރުތަކުގެ ފިރިހެނުންނާ އަޅާބަލާއިރު މިހާރުގެ ފިރިހެނުންގެ ޓެސްޓޮސްޓަރޯން ލެވެލް ވަނީ ގާތްގަނޑަކަށް %15 އާއި %20 އާ ދެމެދުގެ މިންވަރަކަށް ދަށްވެފައެވެ. މިއީ ވަރަށް ބޮޑު ތަފާތެކެވެ. މިސާލަކަށް، މިއަދުގެ 60 އަހަރުގެ މީހެއްގެ ހަށިގަނޑުގައި ހުންނަ ހޯރމޯންގެ މިންވަރު، 1980 ގެ އަހަރުތަކުގައި 60 އަހަރުވީ މީހެއްގެ ހަށިގަނޑުގައި ހުރި މިންވަރަށްވުރެ ބޮޑުތަނުން ދަށެވެ. މީގެ މާނައަކީ މިއީ ހަމައެކަނި އިންސާނާގެ ބަޔޮލޮޖިކަލް އުމުރާ ގުޅިފައިވާ ކަމެއް ނޫން ކަމެވެ.
ޓެސްޓޮސްޓަރޯންއަކީ ފިރިހެނެއްގެ ހަށިގަނޑުގެ މަސްތަކުގެ ވަރުގަދަކަމާއި، ކަށީގެ ދުޅަހެޔޮކަމާއި، ހަކަތައާއި، އަދި ޖިންސީ ދުޅަހެޔޮކަމާ ގުޅިފައިވާ އެންމެ މުހިންމު ހޯރމޯންއެވެ. ނަމަވެސް، ސައިންސްވެރިން ބަޔާންކުރާ ގޮތުގައި މިއީ ހަމައެކަނި ”ފިރިހެންވަންތަކަން“ މިންކުރާ މިންގަނޑެއް ނޫނެވެ. ފިރިހެންވަންތަކަމަކީ އެތައް ސިފަތަކަކާއި ކަންތައްތަކެއްގެ މައްޗަށް އެކުލެވިގެންވާ ކަމެކެވެ. އަދި ހޯރމޯން ލެވެލް ކުޑަކޮށް ދަށްވެފައިވާ ގިނަ ފިރިހެނުންނަކީވެސް ސިއްހީ ގޮތުން ބަލާއިރު އާންމު މިންގަނޑެއްގައި ހަރަކާތްތެރިވާ، ދުޅަހެޔޮ ބައެއްކަން ފާހަގަކުރަންޖެހެއެވެ.
މި ބަދަލު އަންނަން މެދުވެރިވާ މުހިންމު ސަބަބުތައް
މި ހޯރމޯން ދަށްވަމުންދާ ސީދާ ސަބަބެއް އަދި ކަނޑައެޅިގެން އެނގިފައި ނުވި ނަމަވެސް، ޒަމާނީ ދިރިއުޅުމުގެ ބައެއް ކަންކަން މީގައި ބޮޑު ދައުރެއް އަދާކުރެއެވެ. ފުރަތަމަ ކަމަކީ ބަރުދަން އިތުރުވުމާއި (Obesity) މެޓަބޮލިކް ބަލިތައް ގިނަވުމެވެ. ހަށިގަނޑުގައި ސަރުބީ ގިނަވުމަކީ ޓެސްޓޮސްޓަރޯން ދަށްކޮށްދޭ ކަމެކެވެ. ދެވަނަ ކަމަކީ ކަސްރަތު ކުރުމާއި ހަށިގަނޑު ހަރަކާތްތެރިކޮށް އުޅޭ މިންވަރު މަދުވުމެވެ. ގިނަ ވަގުތު އިށީނދެގެން ތިބެ ކުރާ މަސައްކަތްތައް އިތުރުވުމަކީ ހަށިގަނޑުގެ ހޯރމޯން ނިޒާމަށް ނޭދެވޭ އަސަރުކުރާ ކަމެކެވެ.
މީގެ އިތުރުން، ނަފްސާނީ ބުރަބޮޑުވުމާއި (Stress) ނިދި މަދުވުމަކީވެސް މުހިންމު ސަބަބުތަކެކެވެ. ސްޓްރެސް ހޯރމޯން ކަމަށްވާ ކޯޓިޒޯލް އިތުރުވުމުން ޓެސްޓޮސްޓަރޯން އުފެއްދުން މަދުވެއެވެ. ހަމައެހެންމެ، ތިމާވެށީގެ ތެރޭގައި ހުންނަ އެކި ކެމިކަލްތަކާއި، ޕްލާސްޓިކްގެ ބާވަތްތަކުން ބޭރުވާ ”އެންޑޯކްރިން ޑިސްރަޕްޓަރސް“ ތަކަކީވެސް ހަށިގަނޑުގެ ހޯރމޯންތަކަށް ބުރޫއަރުވާ އެއްޗެހި ކަމަށް ދިރާސާތަކުން ދައްކައެވެ.
ޓެސްޓޮސްޓަރޯން ލެވެލް ދަށްވަމުންދާ ދިއުމަކީ ކުއްލިއަކަށް ދިމާވި ސިއްހީ ކާރިސާއެއް ނޫން ނަމަވެސް، މިއީ ދިގު މުއްދަތަކަށް ބަލާއިރު މުޖުތަމައުގެ ދުޅަހެޔޮކަމަށް އޮތް ގޮންޖެހުމެކެވެ. ފާއިތުވި އަހަރުތަކުގައި މި މިންވަރު ދަށްވެފައިވީ ނަމަވެސް، ގިނަ ފިރިހެނުން އަދިވެސް ތިބީ ސިއްހީ ގޮތުން ނުރައްކަލެއް ނެތް މިންގަނޑެއްގައެވެ. މިކަމުން ސަލާމަތްވުމަށްޓަކައި ކަސްރަތު ކުރުމާއި، ދުޅަހެޔޮ ކާނާ ބޭނުންކުރުމާއި، އަދި ނަފްސާނީ ދުޅަހެޔޮކަމަށް ސަމާލުކަން ދިނުމަކީ ކޮންމެހެން ބޭނުންތެރި ކަމެކެވެ. ސައިންސްވެރިން ދަނީ މި ބަދަލުގެ ސަބަބުން ކުރިމަތިވެދާނެ އިތުރު މައްސަލަތައް ދެނެގަތުމަށް މެދުނުކެނޑި ދިރާސާ ކުރަމުންނެވެ.
