2026 އޭޕްރިލް 21 ވަނަ ދުވަހުގެ ރޭ މޯލްޑިވްސް ނޭޝަނަލް ޔުނިވަރސިޓީ (އެމް.އެން.ޔޫ) ގެ ދަނާލުގައި ހިނގި ހިތާމަވެރި މަރުގެ ހާދިސާއަކީ މުޅި ގައުމު ސިއްސުވާލި ކަމެކެވެ.
މި ހާދިސާއާ ގުޅިގެން ކަމާބެހޭ އިދާރާތަކުން އަމަލުކުރި ގޮތާމެދު އާންމުންގެ މެދުގައި ބޮޑެތި ސުވާލުތަކެއް އުފެދިފައިވާއިރު، ހޯމް މިނިސްޓަރު އަލީ އިހުސާން ބޭއްވި ނޫސްވެރިންގެ ބައްދަލުވުމުން ފެނިގެންދިޔައީ މައްސަލައިގެ ސާފު މައުލޫމާތު މިނިސްޓަރަށް އެނގިވަޑައިނުގަންނަވާ ކަމުގެ ނިޝާންތަކެކެވެ. މި ހާދިސާއަކީ ހަމައެކަނި މަރުގެ މައްސަލައެއް ނޫނެވެ. މިއީ ދައުލަތުގެ ރައްކާތެރިކަމުގެ ނިޒާމާއި އިމަޖެންސީ ހޮޓްލައިންތަކުގެ ހަރުދަނާކަމާ މެދު އުފެދޭ ބޮޑު ސުވާލު މާކެކެވެ.
ހޮޓްލައިންގެ އިޖާބަދިނުމާއި ވަގުތުގެ ފަރަގު
މި ހާދިސާގައި އެންމެ ބޮޑު ކަންބޮޑުވުމެއް އޮތީ ނަފްސާނީ އެހީތެރިކަން ފޯރުކޮށްދޭ ’ވިކްޓިމް ސަޕޯޓް ހޮޓްލައިން‘ އަށް ފޮނުވި މެސެޖުތަކަށް އަމަލުކުރި ގޮތާ މެދުގައެވެ. މިނިސްޓަރު ހިއްސާކުރެއްވި ތާވަލަށް ބަލާއިރު، އެހީއަށް އެދި ފުރަތަމަ މެސެޖު ކޮށްފައިވަނީ އެރޭ 8:40 ގައެވެ. އެ މެސެޖުގައި އޭނާގެ ފުރާނަ ދުއްވާލަން އުޅޭކަމުގެ ސާފު އިޝާރާތެއް ދީފައިވީ ނަމަވެސް، ދެވަނަ މެސެޖެއް ލިބުނު ދަންވަރު 12:38 އާ ހަމައަށް ހަތަރު ގަޑިއިރުގެ ހުސްކަމެއް އޮތެވެ. މި މުއްދަތުގެ ތެރޭގައި އެއްވެސް އިދާރާއަކުން އެ ތަނަށް ގޮސްފައި ނުވުމަކީ ނިޒާމުގެ ތެރޭގައި އޮތް ބޮޑު ބޯގޯހެކެވެ.
ފުލުހުންގެ ހަރަކާތްތެރިވުން ވަރަށްވެސް ލަސް
ފުލުހުންގެ ކޮމާންޑް ސެންޓަރަށް މިކަން ރަސްމީކޮށް އަންގާފައިވަނީ ދަންވަރު 1:03 ގައެވެ. ފުލުހުން 1:08 ގައި އެ ސަރަހައްދަށް ދިޔަ ނަމަވެސް، ކޮޓަރިއަށް ވަދެވުނީ އޭގެ ބައިގަޑިއިރަށްވުރެ ގިނަ އިރު ފަހުން 1:38 ހާއިރުއެވެ. މިނިސްޓަރު ވިދާޅުވި ގޮތުގައި މި ވަގުތުތައް ހޭދަވީ ދަނާލުގެ ސެކިއުރިޓީއާ ގުޅިގެން ކޮޓަރި ދެނެގަތުމަށާއި ވަދެވޭނެ ގޮތެއް ހޯދުމަށެވެ. މިއީ މަތީ ތައުލީމުދޭ މުއައްސަސާއެއްގެ ދަނާލެއްގައި ހިނގި ކަމަކަށްވާއިރު، ކުއްލި ހާލަތެއްގައި ކޮޓަރިތަކަށް ވަދެވޭނެ އަވަސް ނިޒާމެއް ނެތުމަކީ އިދާރީ ގޮތުން ފެއިލްވުމެކެވެ.
މިނިސްޓަރުގެ ޖަވާބުދާރީވުމާއި ފަންނީ ރިވިއު
ނޫސްވެރިންގެ ބައްދަލުވުމުގައި މިނިސްޓަރު އަލީ އިހުސާން ދެއްކެވި ވާހަކަފުޅުތަކުން އެނގިގެންދިޔައީ، މައްސަލައިގެ ފުންމިނަށް ބަލައި ސާފު ޖަވާބެއް ދެއްވުމުގެ ބަދަލުގައި، ހުރިހާ ކަމެއް ’މިނިވަން ފަންނީ ރިވިއު‘ އަކަށް ދޫކޮށްލާފައިވާ ކަމެވެ. ހާދިސާ ހިނގިތާ ދެ ދުވަސް ވެގެންދިޔައިރު، ހޮޓްލައިން މެސެޖުތަކަށް އިޖާބަ ނުދެވި ލަސްވި ސަބަބު ސާފުކޮށްދެއްވަން މިނިސްޓަރަށް އެނގިވަޑައިނުގަތުމަކީ އާންމުންގެ އިތުބާރު ގެއްލޭ ކަމެކެވެ. ހާއްސަކޮށް، މި ހާދިސާ ހިނގި ފަރާތަކީ މީގެ ކުރިންވެސް އެހީތެރިކަން ހޯދާފައިވާ ފަރާތަކަށް ވާއިރު، އެފަދަ ހައި-ރިސްކް ކޭސްތަކަށް ދޭންޖެހޭ ސަމާލުކަން ކުޑަވުމަކީ ބަލައިގަނެވޭނެ ކަމެއް ނޫނެވެ.
ދަނާލުގައި ހިނގި މި ހިތާމަވެރި ހާދިސާއިން ހާމަވެގެންދިޔައީ ރާއްޖޭގެ ކުއްލި އެހީގެ ނިޒާމުގައި ހުރި ބޮޑެތި ރަންދަފާ ތަކެވެ. ހަތަރު ގަޑިއިރުގެ ވަގުތަކީ ފުރާނައެއް ސަލާމަތް ކުރަން އެތައް ފުރުސަތެއް ލިބުނު ވަގުތެކެވެ. މިނިސްޓަރުގެ ޖަވާބުތަކުން ފެނުނު ނޭނގުމާއި، އިދާރާތަކުގެ މެދުގައި އޮތް ގުޅުން ކުޑަވުމުގެ ނަތީޖާއަކީ ޒުވާން ފުރާނައެއް ގެއްލިގެން ދިއުމެވެ. ކުރިއަށް އޮތް ރިވިއުއިން މިކަމުގެ ހަގީގަތް ހާމަވެ، އިހުމާލުވި ފަރާތްތަކަށް ފިޔަވަޅު އެޅުމަކީ ނިޒާމަށް އިތުބާރު ހޯދުމަށް ކޮންމެހެން ކުރަންޖެހޭ ކަމެކެވެ.
