ކުރިއަށް އޮތް 3 ދުވަހުވެސް ރާއްޖޭގެ އެކިހިސާބަށް ވިއްސާރަކުރާނެ ކަމަށް މޫސުމާ ބެހޭ ގައުމީ އިދާރާ، މެޓް އޮފީހުން ޙަމަކޮށްފިއެވެ.
މިގޮތުން ބައެއް ރަށްތަކަށް ވިއްސާރައާއެކު ގުގުރުންވެސް އެކަށީގެންވާ ކަމަށް ނެޓް އޮފީހުން ވަނީ މައުލޫމާތުދީފައެވެ.
މެޓް އޮފީހުން މައުލޫމާތު ދޭގޮތުގައި، ކުރިއަށް އޮތް 72 ގަޑިއިރުގެ ތެރޭގައި ވައިއެނބުރޭނީ މަޑުން ހުޅަނގާއި ހުޅަނގުއުތުރުން ގަޑިއަކު 3 މޭލާއި 10 މޭލާ ދެމެދުގެ ބާރުމިނުގައި ކަމަށެވެ. އަދި ބައެއް ރަށްތަކަށް ކެރީގެ އަސަރުފޯރި ނަމަވެސް ބޯކޮށް ވާރޭ ނުވެހޭނެ ކަމަށެވެ. އަދި ރާއްޖޭގެ ކަނޑުތައް މަޑުވެ، ރާޅުގެ އެންމެ އުސްމިން ހުންނާނީ 3 ފޫޓުގައި ކަމަށްވެސް އެ އިދާރާއިން ބުނެފައިވެއެވެ. ވޭތުވެދިޔަ ދުވަސްތަކަކީ އާދަޔާ ޚިލާފަށް ހޫނު ގަދަ ދުވަސްތަކެއް ނަމަވެސް، ފާއިތުވި ދުވަސްތަކު ރާއްޖޭގެ އެކި ކަންކޮޅުތަކަށް ދަނީ ވާރޭވެހެމުންނެވެ.
