ކުރިއަށް އޮތް އަޟްޙާ ޢީދު ބަންދާ ދިމާކޮށް ޤައުމީ އެއާލައިން ”މޯލްޑިވިއަން“ އިން 64,000 އަށްވުރެ ގިނަ ސީޓު ދަތުރުވެރިންނަށް ފޯރުކޮށްދިނުމަށް ހަމަޖެހިއްޖެ އެވެ.
މޭ މަހުގެ 17 އިން ޖޫން މަހުގެ 2ވަނަ ދުވަހުގެ ނިޔަލަށް އެ އެއާލައިނުން ޖުމްލަ 1,227 ފްލައިޓް ދަތުރުތައް ކުރިއަށް ގެންދިއުމަށް ވަނީ ހަމަޖެހިފަ އެވެ. މީގެ ތެރޭގައި ޝެޑިއުލް ކުރެވިފައިވާ 1,114 ދަތުރުގެ އިތުރުން، މި ދުވަސްވަރަށް ޚާއްސަކޮށްގެން އިތުރުކުރެވުނު 213 ފްލައިޓް ހިމެނެއެވެ. ޢީދު ފަދަ ދުވަސްވަރު ފްލައިޓްތައް ފުލްވުމަކީ އޭވިއޭޝަން ދާއިރާގައި އަބަދުވެސް ދިމާވާ ކަމެއް ކަމަށާއި، ޑިމާންޑް ހުންނަ މިންވަރަށް ސީޓު ފޯރުކޮށްދިނުމަށް ކެޕޭސިޓީ ހުރި މިންވަރަކުން މަސައްކަތްތައް ކުރުމަށް ވަނީ ހަމަޖެހިފަ އެވެ.
ޢީދު ބަންދާ ދިމާކޮށް އާންމުކޮށް ކުރާ ދަތުރުތަކަށްވުރެ 20 އިންސައްތަ އިތުރު ދަތުރުތައް ކުރަން ރޭވިފައިވީ ނަމަވެސް، އެއާލައިނުން ފާހަގަކުރި ގޮތުގައި މިއީ އެއާލައިނުގެ އޮޕަރޭޝަނަލް ކެޕޭސިޓީ ހުރި ގޮތުން މިވަގުތު އިތުރުކުރެވެން އޮތް އެންމެ މަތީ މިންވަރެވެ. މި ދަތުރުތަކާ ގުޅޭގޮތުން އޮތް އެންމެ ބޮޑު އެއް ގޮންޖެހުމަކީ އިޤްތިޞާދީ ގޮތުން ދިމާވާ ދަތިތަކެވެ.
ޢީދަށް ރަށްރަށަށް ދާ ފްލައިޓްތައް ފުލްކޮށް ދިޔަ ނަމަވެސް، ޢީދު ނިމިގެން އެނބުރި އަންނަ ފްލައިޓްތަކުގައި ގިނަ ފަހަރަށް ފަސިންޖަރުން މަދުވުމުގެ ސަބަބުން ސީޓުތައް ހުސްކޮށް ހުންނައިރު، ސަރުކާރުން ބުނި ގޮތުގައި މީގެ ސަބަބުން ބައެއް ޙާލަތްތަކުގައި މިފަދަ އިތުރު ދަތުރުތަކަކީ އެއާލައިނަށް މާލީ ގޮތުން އެންމެ ފައިދާހުރި ދަތުރުތަކަށް ނުވެއެވެ.
މޯލްޑިވިއަން އިން މިހާރު ދަނީ އެއާލައިނުގެ ފްލީޓް ޒަމާނީ ކުރުމުގެ މަސައްކަތް ކުރަމުންނެވެ. އެގޮތުން ދާދި ފަހުން ވަނީ 5 ވަނަ އޭޓީއާރު (ATR 42-600) މަރުކާގެ ބޯޓު ފްލީޓާ ގުޅިފައެވެ. މި އާ ބޯޓުތަކާއެކު ދަތުރުތަކުގެ އިތުބާރު ބޮޑުވެ، ފަސިންޖަރުންނަށް ލިބޭ ހިދުމަތް ރަނގަޅުވެގެންދާނެ ކަމަށް އެއާލައިނުން އުންމީދު ކުރެއެވެ. މި ދަތުރުތަކަށް ފަސޭހަ ކުރުމަށްޓަކައި އެއާލައިނުން ވަނީ ޚާއްސަ އަގުތަކެއްވެސް ތަޢާރަފްކޮށްފައެވެ. އެގޮތުން 749 ރުފިޔާއާއި 1,222 ރުފިޔާއާ ދެމެދުގެ އަގުތަކެއްގައި ބައެއް މަންޒިލްތަކަށް ޓިކެޓް ލިބެން ހުންނާނެ ކަމަށް އެއާލައިނުން ހާމަކުރެއެވެ.
ޢީދު ބަންދާ ދިމާކޮށް ވެލާނާ އިންޓަނޭޝަނަލް އެއާޕޯޓަށް ބާރުބޮޑުވާނެތީ، އެމްއޭ.ސީއެލް އިން ވަނީ ފްލައިޓް ފުރުމުގެ 3 ގަޑިއިރު ނުވަތަ 4 ގަޑިއިރު ކުރިން އެއާޕޯޓަށް ދިއުމަށް އެދިފަ އެވެ.
