އުތުރު ކަޝްމީރުގެ ވޫލަރް ކުޅީގައި ލޮޓަސް މާތައް އަލުން ފޮޅެން ފަށައިފިއެވެ.
މިއީ ތިމާވެށި އިއާދަވުމާއި އާ އުންމީދެއް ލިބިގެންދިޔަ ކަމެއްގެ ގޮތުގައި ވަނީ ފާހަގަވެފައެވެ. 1992 ވަނަ އަހަރު ކުރިމަތިވި ނުރައްކާތެރި ފެންބޮޑުވުމުގެ ސަބަބުން، ކަޝްމީރުގެ ވޫލަރް ކުޅީގެ ފުލުގައި ބޯކޮށް ކިސަޑާއި ކަށިވެލި ޖަމާވެ، އެ ކުޅީގެ ހިތްގައިމު ފިޔާތޮށި ލޮޓަސް ބަގީޗާތައް 33 އަހަރަށްވުރެ ގިނަ ދުވަހު ވަނީ މުޅިން ގެއްލިފައެވެ.
މި މާތައް ނެތިދިއުމުގެ ސަބަބުން އެ ސަރަހައްދުގެ މީހުންނަށް ވަރަށް ބޮޑެތި އަސަރުތަކެއް ކުރިއެވެ. އެއީ އެ ސަރަހައްދުގެ ގިނަ ބަޔަކީ ކެއުމަށާއި އާމްދަނީ ހޯދުމަށްޓަކައި، ”ނާދްރޫ“ ގެ ނަމުން މަޝްހޫރުވެފައިވާ މިމަލުގެ ތަނޑު ހޯދުމުގެ މަސައްކަތަށް ބަރޯސާވެފައިވާ ބަޔަކަށް ވާތީއެވެ. ދުވަސްތައް ފާއިތުވަމުން ދިޔަވަރަކަށް، ދިރުމުން ފުރިގެންވި އެ ކުޅީގެ ފެންގަނޑު ފަޅުވެ، ގިނަ އާއިލާތަކަކަށް ދިރިއުޅުމަށްޓަކައި އެހެން މަސައްކަތްތައް ހޯދަން މަޖުބޫރުވިއެވެ.
މި އުފާވެރި ބަދަލު އައީ ’ވޫލަރް ކޮންޒަވޭޝަން އެންޑް މެނޭޖްމަންޓް އޮތޯރިޓީ‘ އިން ހިންގި ބޮޑު މަޝްރޫއެއްގެ ދަށުން، ކުޅީގައި ޖަމާވެފައިވާ ގިނަ އަދަދެއްގެ ކިސަޑުތައް ނަގައި ސާފުކުރުމާ ގުޅިގެންނެވެ. ކުޅީގެ ފުލަށް އަލުން އިރުގެ އަލިކަން ފޯރަން ފެށުމާއެކު، އެތައް އަހަރެއް ވަންދެން ބިމުގެ އަޑީގައި ވަޅުލެވިފައިވާ ލޮޓަސްގަހުގެ މޫތަކުގައި އަލުން ދިރުން އުފެދި، ގަސްތައް ފަޅަން ފެށިއެވެ.
އެ ސަރަހައްދުގެ މީހުން މި މަންޒަރު ސިފަކުރަނީ ވަރަށް އަސަރުގަދަ އަދި ހަނދާނުން ފުހެލަން ދަތި ކަމެއްގެ ގޮތުގައެވެ. އަދި ދާއިމަށް ގެއްލިދާނެ ކަމަށް ބިރުގަތް ގުދުރަތީ ތިމާވެށީގެ ނިޒާމާއި ކުރީގެ އާދަކާދަތައް އަލުން ލިބުމުން، ގިނަ ބަޔަކު ދަނީ އެކަން ފާހަގަކޮށް އުފާ ފާޅުކުރަމުންނެވެ.
ވޫލަރް ކުޅީގައި އަލުން މާތައް ފޮޅެން ފެށުމަކީ، އެކަށީގެންވާ އަޅާލުމާއި ރައްކާތެރިކަން ދިނުމުން، ގުދުރަތީ ތިމާވެށި އަމިއްލައަށް އިއާދަވުމުގެ ކުޅަދާނަކަން ހުރިކަން ހަނދާންކޮށްދޭ ހައިރާންކުރުވަނިވި މިސާލެކެވެ.
