ޙައްޖު ދުވަހަކީ ނުވަތަ ޢަރަފާތް ދުވަހަކީ އިސްލާމީ ތާރީޚާއި މުޅި އިސްލާމީ އުންމަތުގައި އަންނަ އެންމެ މާތް، އެންމެ ބަރަކާތްތެރި އެއް ދުވަހެވެ. މި ދުވަހުގެ މާތްކަމާއި މުހިންމުކަން ބަޔާންކުރައްވައި ކައު އިތުރު ރަސޫލާ ﷺ ޙަދީޘް ކުރައްވާފައިވަނީ ”ޙައްޖަކީ ޢަރަފާތް“ ކަމަށެވެ. މިއިން ދޭހަވަނީ ޙައްޖުގެ އަޅުކަމުގައި ޢަރަފާތް ދުވަހު އެ ބިމުގައި މަޑުކުރުމުގެ އޮންނަ މުހިންމުކަމެވެ.
ޙައްޖު ދުވަހުގެ މާތްކަން ބަޔާންކުރާ އެންމެ މުހިންމު އެއް ކަމަކީ، އެ ދުވަހަކީ މާތް ﷲ އިސްލާމްދީން ފުރިހަމަކޮށްދެއްވި ދުވަސް ކަމުގައިވުމެވެ. މުސްލިމުންގެ މައްޗަށް ދީނުގެ ނިޢުމަތް ފުރިހަމަކޮށްދެއްވިކަމުގެ އާޔަތް ބާވައިލެއްވީ ޢަރަފާތް ދުވަހެއްގައެވެ. މިއީ މާތް ﷲ އެކަލާނގެ އަޅުތަކުންނަށް ދެއްވި ވަރަށް ބޮޑު މާތްކަމެކެވެ.
ޙައްޖު ދުވަހަކީ ދުނިޔޭގެ އުޑަށް މާތް ﷲ ރަޙުމަތް ބާވައިލައްވައި، ޢަރަފާތް ބިމުގައި ތިބޭ އަޅުތަކުންނާ މެދު މަލާއިކަތުންގެ ކުރިމަތީގައި ފަޚުރުވެރިވެވޭ ދުވަހެކެވެ. އެކަލާނގެ އަޅުތަކުންނަށް ފާފަ ފުއްސަވައި، ނަރަކައިން މިންޖުކުރައްވާ މިންވަރު އެންމެ ގިނަ ދުވަހަކީވެސް މި ދުވަހެވެ. މި ބަރަކާތްތެރި ދުވަހު ޙައްޖަށް ގޮސް ތިބޭ މީހުން ދުޢާކުރުމުގައާއި ޛިކުރުގައި ވަގުތު ހޭދަކުރާއިރު، ޙައްޖަށް ނުދާ މީހުންނަށްވެސް މި ދުވަހުގެ މާތްކަމުން ނަސީބު ލިބިގަތުމުގެ ފުރުޞަތު އޮވެއެވެ.
ޙައްޖަށް ނުދާ މީހުންނަށް މި ދުވަހު އޮތް އެންމެ މާތް އަޅުކަމަކީ ރޯދަ ހިފުމެވެ. ރަސޫލާ ﷺ ޙަދީޘް ކުރައްވާފައިވާ ގޮތުގައި، ޢަރަފާތް ދުވަހުގެ ރޯދައަކީ އިސްވެދިޔަ އަހަރާއި ކުރިއަށް އޮތް އަހަރުގެ ކުދި ފާފަތައް ފުހެވިގެންދާނެ ކަމެކެވެ. މިއީ ކޮންމެ މުސްލިމަކުވެސް ހޯދަން އެދޭނެ ވަރަށް ބޮޑު ދަރުމައެކެވެ.ދުޢާ އިޖާބަކުރެއްވުން
ޙައްޖު ދުވަހަކީ ދުޢާ އިޖާބަކުރެއްވުން ގާތްވެގެންވާ ދުވަހެކެވެ. ”އެންމެ ހެޔޮ ދުޢާއަކީ ޢަރަފާތް ދުވަހުގެ ދުޢާ“ ކަމަށް ޙަދީޘްފުޅުތަކުން ސާބިތުވެއެވެ. އެހެންކަމުން، މި ދުވަހުގެ ބޭނުން ހެޔޮގޮތުގައި ހިފައި، ގިނަގިނައިން ތައުބާވެ، ޛިކުރުކޮށް، ދުޢާކުރުމަކީ ކޮންމެ މުސްލިމެއްގެ މައްޗަށް އޮތް މުހިންމު ކަމެކެވެ.
ޙައްޖު ދުވަހަކީ މާތް ﷲ ގެ ރަޙުމަތާއި ފާފަފުއްސެވުމުގެ ދޮރުތައް ހުޅުވިފައިވާ، އީމާންކަން އާކޮށްދޭ ބަރަކާތްތެރި ދުވަހެކެވެ. މި ދުވަހުގެ މާތްކަން ދަނެ، ހެޔޮ އަމަލުތަކުން ދުވަސް ފަވާލުމަކީ ދުނިޔެއާއި އާޚިރަތުގެ ބާއްޖަވެރިކަން ލިބިދޭނެ ކަމެއްކަން ކަށަވަރެވެ.
