އެސްޓީއޯއިން ވިއްކަމުންދާ ޕެޓްރޯލާއި ޑީސަލްގެ އަގު ހެޔޮކޮށްފިއެވެ.
މިއަދުން ފެށިގެން ޕެޓްރޯލް ލީޓަރެއް ވިއްކާނީ، ކުރިން ޕެޓްރޯލް ވިއްކި އަގަށްވުރެ -/1.53 ރުފިޔާ އަގުހެޔޮކޮށް، -/8.07 ރުފިޔާއަށްކަމަށް އެ ކުންފުނިން ބުނެފައިވެއެވެ. ކުރިން ޕެޓްރޯލް ލީޓަރެއް ވިއްކަމުންއައީ /-9.60 ރުފިޔާއަށެވެ.
މީގެ އިތުރުން، އެސްޓީއޯއިން ހާމަކުރިގޮތުގައި މީގެ ކުރިން، /-10.39 ރުފިޔާއަށް ވިއްކަމުންއައި ޑީސަލް ލީޓަރެއް ކުރިއަށްއޮތްތަނުގައި ވިއްކާނީ -/8.71 ރުފިޔާއަށް ކަމަށެވެ. މި އަގަކީ، ކުރިން ވިއްކަމުންއައި އަގާ އަޅައިބަލާއިރު -/1.68 ރުފިޔާ ހެޔޮ އަގެކެވެ.
މިއީ އެސްޓީއޯއިން ވިއްކަމުންދާ ތެލުގެ އަގު މި މަސްތެރޭގައި ހެޔޮކުރިތާ ދެވަނަފަހަރެވެ. މީގެ ކުރިން، މި މަހުގެ 13 ވަނަ ދުވަހު އެ ކުންފުނިންވަނީ ޕެޓްރޯލާއި ޑީސަލްގެ އަގު ހެޔޮކޮށްފައެވެ.
ދިވެހިރާއްޖެއަށް ފެތުރެމުންދާ ކޮރޯނާ ވައިރަހާއި ގުޅިގެން، އިޤުތިޞާދީގޮތުން އަޅާ ފިޔަވަޅުތައް ހާމަކުރުމުގެ ގޮތުން ވޭތުވެދިޔަ ބުރާސްފަތިދުވަހު ސަރުކާރުން ކުރިއަށްގެންދިޔަ ނޫސްވެރިންގެ ބައްދަލުވުމުގައި، އިކޮނޮމިކް މިނިސްޓަރު ފައްޔާޒް އިސްމާޢީލްވެސް ވަނީ، ތެޔޮ އަގުހެޔޮ ކުރުމަށް ނިންމަވާފައިވާކަމަށް ވިދާޅުވެފައެވެ.
