ޖެންޑަރ މިނިސްޓްރީގެ ބެލުމުގެދަށުގައި ތިބި މީހުންގެ ޙައްޤުތައް ކަށަވަރުކޮށްދިނުމަށްޓަކައި ކުރަންޖެހުނު، ހުރިހައިކަމެއް ކުރައްވާނެކަމަށް ޖެންޑަރ މިނިސްޓަރު ޢާއިޝަތު މުޙައްމަދު ދީދީ ވިދާޅުވެއްޖެއެވެ.
އާދިއްތަ ދުވަހުގެރޭ ބޭއްވި ނޫސްވެރިންގެ ބައްދަލުވުމުގައި ނޫސްވެރިންނައި މަޢުލޫމަތު ހިއްސާކުރައްވަމުން މިނިސްޓަރު ޢާއިޝަތު މުޙައްމަދު ދީދީ ވިދާޅުވީ، އާންމު ސިއްހަތުގެ ކުއްލި ނުރައްކަލުގެ ހާލަތުގައި ވެސް، އިޖުތިމާޢީ ރައްކާތެރިކަން ކަށަވަރުމަކީ، އެ މިނިސްޓްރީން ޚާއްސަ އަހައްމިއްޔަތެއް ދެއްވައިގެން ކުރައްވާނެ ކަމެއްކަމަށެވެ.
މި ގޮތުން، ޖެންޑަރ މިނިސްޓްރީގެ ބެލުމުގެދަށުގައިވާ ހުރިހައި މަރުކަޒެއްގައި، މަސްދުވަހަށް ފުދޭވަރަށް ކާބޯތަކެތީގެ އިންތިޒާމުތައް ހަމަޖައްސަވާފައިވާނެކަމަށް ޢާއިޝަތު މުޙައްމަދު ދީދީ ވިދާޅުވިއެވެ.
ޢާއިޝަތު މުޙައްމަދު ދީދީ ވިދާޅުވީ، ކުޑަކުދިންގެ ހިޔާގައި އައިސޮލޭޝަން ދެ ރޫމް ޤާއިމުކޮށްފައިވާނެކަމަށާއި، ފިޔަވަތީގައި އައިސޮލޭޝަން ތިން ރޫމް ޤާއިމުކޮށްފައިވާނެކަމަށެވެ.
މީގެ އިތުރުން، ޚާއްސަ އެހީއަށް ބޭނުންވާ މަރުކަޒުގައި ވެސް އައިސޮލޭޝަން ދެ ރޫމު ތައްޔާރުކުރުމުގެ މަސައްކަތްތައް ކުރިއަށްދާކަމަށާއި، އެމަޖެންސީ ހާލަތްތަކުގައި ފަރުވާދިނުމަށްޓަކައި، ބޭނުންވާނެ މެޑިކަލް ފެސިލިޓީ ޤާއިމުކުރުމުގެ މަސައްކަތް ވެސް އެ މަރުކަޒުގައި ކުރިއަށްދާކަމަށެވެ.
