އުސްފަސްގަނޑު ކުރިމަތީގައި ސައިކަލަކާއި ލޮރީއެއް ޖެހި ހިނގި އެކްސިޑެންޓުގައި އަނިޔާވި މީހާ މަރުވެއްޖެއެވެެ.
މި އެކްސިޑެންޓާއި ގުޅިގެން ފުލުހުން ބުނެފައިވަނީ މި އެކްސިޑެންޓުގައި އަނިޔާވި ފިރިހެން މީހާ އައިޖީއެމް ހޮސްޕިޓަލަށް ގެންދިޔައިރު ވެސް އޮތީ މަރުވެފައި އޮތް ކަމަށެވެ.
މި ހާދިސާގެ ރިޕޯޓް ފުލުހުންނަށް ލިބިފައިވަނީ މިއަދު ހަވީރު 15:57 އެހައިކަންހާއިރުއެވެ.
މި އެކްސިޑެންޓް ހިނގި ވަގުތަކީ އޮފީސްތައް ނިންމުމަށްފަހު ގިނަ ބަޔަކު ހުޅުމާލެއަށް ދަތުރުކުރާ ވަގުތަށް ވުމުން، އެ ސަރަހައްދުގެ ޓްރެފިކް ވަނީ ވަރަށް ބޮޑަށް ބާރުބޮޑުވެފައެވެ.
އަދި މިއީ ބަސް ދަތުރުތަކަށް ވެސް ބޭނުންކުރާ މައި މަގަކަށް ވާތީ، މި ހާދިސާއާ ގުޅިގެން ދަތުރުފަތުރު ކުރުމުގައި ގިނަ ދަތިތަކެއް ކުރިމަތިވެފައިވެއެވެ.
ފުލުހުން ބުނީ މި މައްސަލައާ ގުޅިގެން ބަލަންޖެހޭ އިތުރު ކަންކަން މިހާރު ތަހުގީގު ކުރަމުންދާ ކަމަށެވެ. އަދި މި ހާދިސާއާ ގުޅޭ އިތުރު މައުލޫމާތު ލިބުމުން ހިއްސާކުރާނެ ކަމަށްވެސް ފުލުހުން ވިދާޅުވިއެވެ.
