ކޮރޯނާ ވައިރަހާއި ގުޅިގެން އިތުރު ރިސޯޓެއް މޮނިޓަރިންގެ ހާލަތަށް ގެނެވިފައިވާކަމަށް ހެލްތު ޕްރޮޓެކްޝަން އޭޖެންސީން ހާމަކޮށްފިއެވެ.
އާދިއްތަ ދުވަހުގެރޭ އެޗްޕީއޭއިން ބުނީ، ރައްކާތެރިކަމުގެ ގޮތުން ޢަމަލު ކުރަމުން އަންނަ އުސޫލުގެ ދަށުން،ގްރޭންޑް ޕާކް ކޮށްދިއްޕަރު މޯލްޑިވްސް ރިސޯޓުން ކޮވިޑް-19 އަށް ޝައްކުކުރެވޭފަދަ ޢަލާމަތްތަކެއް ހުރި މީހެއްގެ ސާމްޕަލް ނަގާފައިވާކަމަށެވެ.
އެ މީހާއަކީ ބިދޭސީއެއްކަމަށާއި، މިހާރުވަނީ އެ ރިސޯޓު މޮނިޓަރިންގެ ހާލަތަށް ގެނެވިފައިކަމަށް އެޗްޕީއޭއިން ބުނެއެވެ.
https://twitter.com/HPA_MV/status/1249399794012950529?s=20
ގްރޭންޑް ޕާކް ކޮށްދިއްޕަރު މޯލްޑިވްސް ރިސޯޓުން ކޯވިޑް-19 އަށްޝައްކުކުރެވޭ މީހާ ފެނިފައިވާއިރު، ވޭތުވެދިޔަ ސައުވީސް ގަޑިއިރުތެރޭގައިވަނީ މި ވައިރަހަށް ދިވެއްސަކު ވެސް ޕޮޒިޓިވްވެފައެވެ. މި ދިވެހި މީހާ ހިމެނޭހެން، ވައިރަހަށް ޕޮޒިޓިވްވި ދިވެހީންގެ ޢަދަދު 5 އަށް އެރިކަމުގައިވިޔަސް، އޭގެތެރެއިން ދިވެއްސަކު މިހާރު ރަނގަޅުވެފައިވާކަމަށް އެޗްޕީއޭއިން މަޢުލޫމާތުދެއެވެ.
