މޯލްޑިވްސް އިންލޭންޑް ރެވެނިއު އޮތޯރިޓީ (މީރާ) އަށް މާޗުމަހު ލިބޭނެކަމަށް އަންދާޒާކޮށްފައިވާ ޢާމްދަނީއަށްވުރެ، ލިބުނު ޢާމްދަނީ %20.3 އަށް ދަށްވެއްޖެއެވެ.
މީރާއިން މިއަދު ޢާންމުކޮށްފައިވާ، ތަފާސް ހިސާބުތައް ބުނާގޮތުން، މާޗުމަހު، އެ އޮތޯރިޓީއަށް 49.2 މިލިއަން ޑޮލަރު ހިމެނޭގޮތަށް ޖުމްލަ 11.1 ބިލިއަން ރުފިޔާވަނީ ބަލައިގަނެފައެވެ.
މި އަދަދަކީ، 2019 އަހަރުގެ މާޗުމަހުގައި ލިބުނު ޢާމްދަނީއަށްވުރެ %26.9 ދަށް ޢަދަދެކެވެ.
މީރާއިން ބުނީ، މި ޢަދަދަކީ، މި އަހަރުގެ މި މުއްދަތުގައި ލިބޭނެކަމަށް އަންދާޒާކުރި ޢަދަދަށްވުރެ %20.3 ދަށް ޢަދަދެއްކަމަށެވެ.
މި ހުސްވި މަހު އެ އޮތޯރިޓީއަށް ޖީއެސްޓީގެ ގޮތުގައި %57.3 ނުވަތަ 637.67 މިލިއަން ރުފިޔާ ބަލައިގަނެފައިވެއެވެ.
ފަތުރުވެރިކަމަށް ދޫކޮށްފައިވާ ބިންތަކުން ލިބޭ ކުލިން %12 ނުވަތަ 131.64 މިލިއަން ރުފިޔާ މީރާއަށް ބަލައިގަނެފައިވެއެވެ.
ބީ.ޕީޓީގެ ގޮތުގައި %7 ނުވަތަ 81.38 މިލިއަން ރުފިޔާ ބަލައިގެންފައިވާއިރު، ގްރީން ޓެކްސްގެ ގޮތުގައި %7 ނުވަތަ 74.04 މިލިއަން ރުފިޔާ އެ އޮތޯރިޓީއަށްވަނީ ބަލައިގެންފައެވެ.
މީގެ އިތުރުން، އެއަރޕޯޓު ޑިވެލޮޕްމަންޓް ފީގެގޮތުގައި %5 ނުވަތަ 59.17 މިލިއަން ރުފިޔާ ބަލައިގެންފައިވާއިރު، އެހެނިހެން ޓެކުހާއި ފީގެގޮތުގައި %12 ނުވަތަ 128.68 މިލިއަން ރުފިޔާ ބަލައިގެންފައިވާކަމަށް ވެސް މީރާއިން ހާމަކޮށްފައިވެއެވެ.
މި މުއްދަތުގައި މީރާއަށް ލިބިފައިވާ ޢާމްދަނީގެ ޢަދަދު ދަށްވެފައިވަނީ، ކޯވިޑް-19 އާއި ގުޅިގެން ސަރުކާރު ބަންދުކޮށްފައިވުމުގެ ސަބަބުން، މި މުއްދަތުގެތެރޭގައި އައިސްފައިވާ ޓެކުހުގެ ސުންގަޑިތަށް ލަސްވުމާއި، ދިވެހިރާއްޖެއަށް ޒިޔާރަތްކޮށްފައިވާ ފަތުރުވެރިންގެ ޢަދަދު %11.1 ދަށްވެފައިވާތީކަމަށް މީރާއިން ހާމަކުރެއެވެ.
