2020 ވަނަ އަހަރުގެ ކޮވިޑުގެ ހާލަތަށްފަހު ބަޖެޓެރީ ކަންކަން ކުރިއަށް ގެންގޮސްފައިވަނީ ޑެފިސިޓެއްގައިކަމަށާއި އެހެންނަމަވެސް 2025 ވަނަ އަހަރު ޑެފިސިޓް ވަރަށް ބޮޑަށް ކުޑަކުރެވުނުކަމަށް ފިނޭންސް މިނިސްޓަރ ހަސަން ޒަރީރު ވިދާޅުވެއްޖެއެވެ.
ޒަރީރު މިހެން ވިދާޅުވީ ޕީއެންސީގެ މަތީ މަޖިލިސް ކޮންގްރެސްގައި ހުށަހައަޅުއްވައިދެއްވި ޕްރެޒެންޓޭޝަނުގައި ރާއްޖޭގެ އިޤްތިސާދީ ހާލަތަށް އަލިއަޅުއްވާލައްވާ ވާހަކަފުޅު ދައްކަވަމުންނެވެ.
ޒަރީރުގެ ޕްރެޒެންޓޭޝަންގައި ވަނީ 2015 ވަނަ އަހަރުން ފެށިގެން ރާއްޖޭގެ އިޤްތިސާދު ކުރިއަށް ގޮސްފައިވާ ގޮތަށް ބައްލަވާލައްވާފައެވެ.
އެގޮތުން 2020 ވަނަ އަހަރު ކޮވިޑްއާއި ގުޅިގެން ރާއްޖޭގެ އިގްތިސާދަށް ވަރަށް ބޮޑު ހީނަރުކަމެއް ކުރިމަތިވިކަން ފާހަގަކުރައްވާ ޒަރީރު ވިދާޅުވީ، ރާއްޖޭގެ އިގްތިސާދު 2020 ވަނަ އަހަރު 32 އިން ސައްތަ ދަށަށް ދިޔައިރު، 2021 ވަނަ އަހަރު 37 އިން ސައްތައިގެ ކުރިއެރުމެއް ހޯދި ކަމަށެވެ.
ކޮވިޑް19 އަށް ފަހު ރާއްޖޭގެ އިގްތިސާދު ކުރިއަރައިގެން ގޮސް އަނެއްކާވެސް ރާއްޖޭގެ އިގްތިސާދީ ހާލަތު ކޮންމެވެސް ވަރަކަށް ދަށަށް ގޮސްފައިވާކަން ޒަރީރު ފާހަގަކުރެއްވިއެވެ. އެގޮތުން، މި ސަރުކާރު ވެރިކަމާއި ހަވާލުވިއިރު ރާއްޖޭގެ އިގްތިސާދު ހުރީ ގާތްގަނޑަކަށް 5.3 އިންސައްތައިގެ ގްރޯތެއްގައި ކަމަށާއި ނަމަވެސް، 2024 ވަނަ އަހަރު ފެށުނުއިރު އެ އަދަދު ވަނީ ގާތްގަނޑަކަށް 3.4 އިންސައްތަ ދަށަށް ގޮސްފައިކަމަށް ޒަރީރު ވިދާޅުވިއެވެ.
ޒަރީރު ވިދާޅުވީ، 2023 ވަނަ އަހަރު ނިމުނުއިރު އިގްތިސާދީ ހާލަތު ރަނގަޅުވާން ފެށިނަމަވެސް ފިސްކަލް ހާލަތު ވަނީ ވަރަށް ބޮޑަށް ހީނަރުވެފައި ކަމަށެވެ. އޭގެ އިތުރުން، 2024 ވަނަ އަހަރުގެ ބަޖެޓަކީ މި ސަރުކާރު ހަވާލުވިއިރުވެސް ފާސްކުރެވިފައިވާ ބަޖެޓެއްކަމާއި ސަރުކާރުގެ އެއްވެސް ކޮންޓްރޯލެއް އެ ބަޖެޓުގައި ނެތްކަން ޒަރީރު ފާހަގަކުރެއްވިއެވެ. އެހެންނަމަވެސް 2025 ވަނަ އަހަރުގައި އެ އަދަދު ވަނީ 6.3 ޕަސެންޓާއި ހަމައަށް ގެނެވިފައިކަމަށް ޒަރީރު ވިދާޅުވިއެވެ.
2020 ވަނަ އަހަރުގެ ކޮވިޑުގެ ހާލަތަށްފަހު ބަޖެޓެރީ ކަންކަން ކުރިއަށް ގެންގޮސްފައި ވަނީ ޑެފިސިޓެއްގައިކަން ފާހަގަކުރައްވާ ޒަރީރު ވިދާޅުވީ، 2025 ވަނަ އަހަރު ޑެފިސިޓް ވަރަށް ބޮޑަށް ކުޑަކުރެވުނު ކަމަށެވެ. އެގޮތުން ޑެފިސިޓް 3.6 ޕަސެންޓަށް ކުޑަކުރެވުނުކަމަށާއި 2019 ގެ ކުރިން ޑެފިސިޓް އޮތް ލެވެލްއަށް މިދިޔަ އަހަރު ބަޖެޓު ޑެފިސިޓް ކުޑަކުރެވުނުކަމީ ވަރަށް ބޮޑު ކުރިއެރުމެއްކަމަށް އޭނާ ފާހަގަކުރެއްވިއެވެ.
ޒަރީރު ވިދާޅުވީ، ސަރުކާރު ހިއްސާވާ ކުންފުނިތަކަށާއި، ފަތުރުވެރިކަމުގެ ދާއިރާއަށް އަދި އީ- ކޮމާސް ޕްލެޓްފޯމްތަކާއި ބޭސްފަރުވާއަށާއި ދަތުރުފަތުރަށް ބޭނުންވާ ޑޮލަރު ފޯރުކޮށްދިނުމަށް ކުރަންޖެހޭ ހަރަދުތައް ފާއިތުވި އަހަރުތަކުގައި ވަރަށް ބޮޑަށް އިތުރުވެފައިވާ ކަމަށެވެ. އެގޮތުން 2019 އަދި 2020 އާ އަޅާބަލާއިރު 2021 އިން 2023 އަށް އެހެނިހެން ކަންކަމަށް ދޫކުރަންޖެހުނު ޑޮލަރުގެ އަދަދު ގާތްގަނޑަކަށް އެއް ބިލިއަން ޑޮލަރަށް އިތުރުވެފައިވާކަން ފާހަގަކުރެއްވިއެވެ.
މިނިސްޓަރ ވިދާޅުވީ، ފާއިތުވި އަހަރާ އަޅާބަލާއިރު މި އަހަރު އިމްޕޯޓްސް އަށް ފަންޑުކުރަން ޖެހުނު މިންވަރު 539 މިލިއަން ޑޮލަރަށް އިތުރުވެފައިވާ ކަމަށެވެ. މީގެ ތެރެއިން އެންމެ ބޮޑު ގޮންޖެހުމަކާ ކުރިމަތިލާން ޖެހިފައިވަނީ ތެޔޮ އެތެރެކުރުމުގައި ކަމަށާއި، ހަމައެކަނި ތެޔޮ އެތެރެކުރުމަށްޓަކައި ވޭތުވެދިޔަ އަހަރަށްވުރެ އިތުރަށް 290 މިލިއަން ޑޮލަރު މިހާތަނަށް ހަރަދުކުރަން ޖެހިފައިވާ ކަމަށް ވިދާޅުވިއެވެ.
