ކޮރޯނާވައިރަހަށް އިތުރު 5 މީހަކު ޕޮޒިޓިވްވެ ރާއްޖެއިން މި ވައިރަސް ޖެހުނު މީހުންގެ ޢަދަދު، ޖުމްލަ 790 އަށް އަރައިފިއެވެ.
މިނިސްޓްރީ އޮފް ހެލްތުގެ އަޕްޑޭޓްސްތައް ބުނާގޮތުގައި، ހޮނިހިރު ދުވަހުގެ ރޭ މި ވައިރަހަށް ޕޮޒިޓިވްވެފައިވަނީ، 5 މީހުންނެވެ. އެއީ ކޭސް 786އިން ފެށިގެން، 790 އާއި ދެމެދުގެ ކޭސްތައްކަމަށް ވެސް އަޕްޑޭޓްސްގައި ބަޔާންވެފައިވެއެވެ.
މި ގޮތުން ކޭސް 786 އަކީ، ބަންގްލަދޭޝްގެ 34 އަހަރުގެ ފިރިހެނެއް ކަމަށާއި، ކޭސް 787 އަކީ، ބަންގްލަދޭޝްގެ 25 އަހަރުގެ ފިރިހެނެއްކަމަށް ވެސް އަޕްޑޭޓްސްގައިވެއެވެ.
މީގެ އިތުރުން، ކޭސް 788 އަކީ، ބަންގްލަދޭޝްގެ 28 އަހަރުގެ ފިރިހެނެއްކަމަށާއި، ކޭސް 789 އަކީ، ބަންގްލަދޭޝްގެ 36 އަހަރުގެ ފިރިހެނެއްކަމަށާއި، ކޭސް 790 އަކީ ވެސް ބަންގްލަދޭޝްގެ ފިރިހެނެއްކަމަށް، އަޕްޑޭޓްސްގައި ހާމަކޮށްފައިވެއެވެ.
ނަމަވެސް ހޮނިހިރު ދުވަހުގެ ރޭ، ބޭއްވި ނޫސްވެރިންގެ ބައްދަލުވުމުގައި، 19 މީހަކު ޕޮޒިޓިވްވެ ޖުމްލަ އަދަދު 785 އަށް އެރިކަމަށް މަބްރޫކް ޢަޒީޒުވަނީ ވިދާޅުވެފައެވެ.
އޭގެފަހުން، ހޮނިހިރު ދުވަހުގެ ރޭ މެންދަމު 2:23 ގައި، ހެލްތު ޕްރޮޓެކްޝަން އޭޖެންސީން ކުރި ޓްވީޓްގައި، 25 މީހުން ޕޮޒިޓިވްވެފައިވާކަމަށް ހާމަކޮށްފައިވެއެވެ. އެހެންނަމަވެސް ޕޮޒިޓިވްވި މީހުންގެ ޖުމްލަ އަދަދެއްކަމަށް އޮތީ 790 އެވެ.
މި ގޮތުން، ޕްރެސްގައި މަބްރޫކް ހާމަކުރި ޖުމްލަ ޢަދަދު 785 އަށް، އެޗްޕީއޭގެ ޓްވީޓުގައި ބަޔާންކޮށްފައިވާ 25 މީހުން ހިމަނައިފިނަމަ ޖުމްލަ ޢަދަދު 810 އަށް އަރައެވެ. އެހެންކަމުން މަބްރޫކް ޕްރެސްގައި ބަޔާންކުރެއްވި 785 އަށް 5 މީހުން ހިމަނައިފިނަމަ ޖުމްލަ އަދަދަކަށް ވާނީ 790 އެވެ.
ކޮރޯނާ ވައިރަހުގެ ހާލަތު ދުވަހަކަށްވުރެ ދުވަހަކު ގޯސްވަމުންދާއިރު، ރާއްޖެއިން މި ވައިރަސް ޖެހިގެން 03 މީހަކު ވަނީ ނިޔާވެފައެވެ.
