ސަރުކާރަށް ފާޑުކިޔުން އަމާޒުވެފައިވާ ޔޫއޭއީގެ އީގަލް ހިލްސް ކުންފުންޏަށް ރަސްމާލެއިން ބައެއް ދިނުމުގެ އެއްބަސްވުން ދިރާސާކުރަމުން އަންނަ ކަމަށް ޖަމްއިއްޔަތުއްސަލަފުން ބުނެފިއެވެ.
ސަލަފްގެ ތަރުޖަމާނު ޝައިހް ހަސަން ފިކުރީ އެކްސްގައި ވިދާޅުވެފައިވަނީ، ސަރުކާރުން ރަސްމާލޭގައި ހިންގަން އިއުލާނުކޮށްފައިވާ ”މޯލްޑިވްސް ވޯޓާ ފްރަންޓް އެންޑް މެރީނާ“ މަޝްރޫއުއާ މެދު ކަންބޮޑުވުންތަކެއް ހުރިކަމަށް ފެންނާތީ ޖަމްއިއްޔަތުއްސަލަފުން ސަރުކާރުގެ ކަމާ ބެހޭ ފަރާތްތަކާ ބައްދަލުކޮށްގެންނާއި އެހެނިހެން ގޮތްގޮތުން މައުލޫމާތު ސާފުކޮށް، މަޝްރޫއު ދިރާސާކުރަމުންދާ ކަމަށެވެ. އެހެންނަމަވެސް، އެކަމާ ގުޅޭ އިތުރު ތަފްސީލެއް ދެއްވާފައި ނުވެއެވެ.
ސަލަފް ޖަމްއިއްޔާއިން އެ އެއްބަސްވުން ދިރާސާކުރަމުން މިދަނީ އެ މަޝްރޫއާ ގުޅިގެން ހުރި ކަންބޮޑުވުންތައް ގިނަ އަދަދެއްގެ ދީނީ އިލްމުވެރިން ވެސް ފާޅުކުރަމުންދާ ދަނޑިވަޅެއްގައެވެ.
އެ ޖަމިއްޔާގެ އިތުރުން އަދާލަތު ޕާޓީން ވެސް ވަނީ އެ އެއްބަސްވުމާ ގުޅޭ މައުލޫމާތުތައް ސަރުކާރުގެ ކަމާ ބެހޭ ފަރާތްތަކުން ހޯދުމަށް މަސައްކަތް ކުރަމުންދާ ކަމަށް ބުނެފައެވެ. އެގޮތުން އެ ޕާޓީގެ އިސްވެރިން ވަނީ މީގެ ކުރިން އިކޮނޮމިކް މިނިސްޓަރު މުހައްމަދު ސައީދާ ބައްދަލުކުރައްވައި މައުލޫމާތު ސާފުކުރައްވައިފައެވެ.
އެ ޕާޓީގެ ތަރުޖަމާނު ހުސައިން އަންސާރު ވިދާޅުވެފައިވަނީ، ރަސްމާލެ މަޝްރޫއު އާއި ރެޒިޑެންސީ ވިސާ އަދި، ޓައުންޝިޕް ޕްރޮގްރާމާ ގުޅޭގޮތުން ސާފުކުރަންޖެހޭ މައުލޫމާތުތައް ސަރުކާރުގެ ފަރާތުން ހޯދުމަށްފަހު، ކަންބޮޑުވުންތަކެއް ހުރިނަމަ، އެކަންށީގެންވާ ހައްލު ހޯދުަމަށްޓަކައި ކަމާގުޅުންހުރި މުއައްސަސާތަކަށް އެ ކަންކަން ހުށަހަޅާނެ ކަމަށެވެ.
ޔޫއޭއީގެ އީގަލް ހިލްސްއަށް ރަސްމާލޭގެ ބައެއް ދިނުމަށް ސަރުކާރުން މަސައްކަތް ކުރަމުން އަންނައިރު، އެ އެއްބަސްވުމުގެ ސަބަބުން ބޭރުގެ ފަރާތްތަކަށް ދިގު މުއްދަކަށް ރަސްމާލޭގެ ބޮޑު ބައެއް މިލްކުކުރެވޭނެތީ އެއީ ގައުމުގެ ސިޔާދަތަށް ނުރައްކާވެދާނެ ކަމެެއް ކަމަށް ފާޑުކިޔާ ފަރާތްތަކުން ދަނީ ބުނަމުންނެވެ.
އެ އެއްބަސްވުން ގާނޫނުއަސާސީއާ ހިލާފުކަމަށް ބުނެ އެއްބަސްވުން ބާތިލުކުރުމަށް ސުޕްރީމް ކޯޓަށް މިހާރު ވަނީ މައްސަލައެއް ވެސް ހުށަހަޅައިފައެވެ.
