ކޮވިޑް-19 އިން ރައްކާތެރިވުމުގެ ގޮތުން، ހިންމަފުށީގައި ހުންނަ އައްސޭރި ޖަލުގައި ރެންޑަމް ސާމްޕަލް ނެގުމުގެ މަސައްކަތްފަށައިފިއެވެ.
މި ހަރަކާތަކީ، ނޭޝަނަލް އިމަރޖެންސީ އޮޕަރޭޝަންސް ސެންޓަރާއި(އެންއޯސީ)، ކަރެކްޝަނަލް ސަރވިސް ގުޅިގެން ކުރިއަށްގެންދާ ހަރަކާތެކެވެ.
މި ކަން ހާމަކޮށް، މީގެ ކުޑައިރުކޮޅެއް ކުރިން ކަރެކްޝަނަލް ސަރވިސްއިން ބުނީ، ކޯވިޑް-19 އަށް ތަޙުލީލުކުރުމަށްޓަކައި، ހިންމަފުށީ ގައި ހުންނަ އައްސޭރިޖަލުގެ އޮފިސަރުންނާއި، ޤައިދީންގެ ރެންޑަމް ސާމްޕަލްނެގުމުގެ މަސައްކަތް މިހާރު ކުރިއަށްދާކަމަށެވެ.
ކޯވިޑް-19 އިން ރައްކާތެރިވުމުގެ ގޮތުން، ކަރެކްޝަނުން މީގެކުރިން ވެސް، މި ފަދަ ފިޔަވަޅުތަކެއް އަޅާފައިވެއެވެ. މި ގޮތުން، މާފުށީ ޖަލުގެ 15 ޤައިދީއަކާއި، 23 އޮފިސަރުންގެ ރެންޑަމް ސާމްޕަލް ނަގާފައިވެއެވެ.
ކޯވިޑް- 19 އިގެ ނުރައްކާތެރިކަން، މާލެ ފަހަނައަޅައި މިހާރު މިވަނީ، ރާއްޖޭގެ ކަންކޮޅުތަކަށް ދަތުރުކުރަން ފަށާފައެވެ. މި ގޮތުން ބަލާއިރު، ކ.ހިންމަފުށީގައި ހުންނަ އައްސޭރިޖަލާއި އިންވެގެން ހުންނަ ޑްރަގް ޓްރީޓްމަންޓް އެންޑް ރިހެބިލިޓޭޝަން ސެންޓަރުން، 03 މީހަކު ހުކުރުދުވަހުވަނީ، މި ވައިރަހަށް ޕޮޒިޓިވްވެފައެވެ.
