ދިވެހިރާއްޖެއަކީ ފުރިހަމައަށް ތަރައްގީވެފައިވާ، ގައުމަކަށް ހެދުމަށް ސަރުކާރުން އެކަށައަޅާފައިވާ ”ވިޝަން 2040“ ގެ ދުރު ރާސްތާ ތަސައްވުރު ހަގީގަތަކަށް ހެދުމަށްޓަކައި، ރާއްޖޭގައި ހުރި ފަހި ފުރުސަތުތަކުގެ ބޭނުންހިފައި އިންވެސްޓްކުރުމަށް ޗައިނާގެ ވިޔަފާރިވެރިންނަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދައުވަތު އަރުވައިފިއެވެ.
ރައީސުލްޖުމްހޫރިއްޔާ މި ދައުވަތު އެރުވީ ”މޯލްޑިވްސް އެކްސްޕޯ 2026“ އާ ގުޅުވައިގެން ބޭއްވި ”ޗައިނާ-މޯލްޑިވްސް އިންވެސްޓްމަންޓް ކޯޕަރޭޝަން ފޯރަމް“ ޝަރަފުވެރިކޮށްދެއްވައި ވާހަކަފުޅު ދައްކަވަމުންނެވެ.
މި ފޯރަމްގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ، ދިވެހިރާއްޖެ މިހާރު ދަތުރުކުރަމުން ދަނީ ގައުމީ ތަރައްގީގެ ތާރީހީ އައު މަރުހަލާއެއްގައި ކަމަށެވެ. އަދި ސަރުކާރުގެ އެންމެ އިސް އަމާޒަކީ 2040 ވަނަ އަހަރާ ހަމައަށްދާއިރު ރާއްޖެއަކީ ފުރިހަމަ ފުދުންތެރިކަން ލިބިފައިވާ ދައުލަތަކަށް ހެދުން ކަމުގައި އެމަނިކުފާނު ފާހަގަކުރެއްވިއެވެ.
މި ލަނޑުދަނޑި ހާސިލުކުރުމަށްޓަކައި އިގްތިސާދު އެއް ދާއިރާއަކަށް ބަރޯސާވެފައި އޮތް އޮތުން ނިމުމަކަށް ގެނެސް، އިގްތިސާދު ސިންދަފާތުކުރުމާއި، ބައިނަލްއަގްވާމީ ފެންވަރުގެ އިތުބާރުހުރި އިންވެސްޓަރުންނާ އެކު އޮންނަ ގުޅުން މިހާރަށްވުރެ ހަރުދަނާކުރުމަކީ ކޮންމެހެން ބޭނުންތެރި ކަމެއް ކަމަށް ރައީސް ވިދާޅުވިއެވެ.
އިންވެސްޓަރުންނަށް ރައްކާތެރި މާހައުލެއް ގާއިމުކުރުމަށް ސަރުކާރުން އަޅަމުންދާ ފިޔަވަޅުތަކަށް އަލިއަޅުއްވާލައްވަމުން ރައީސުލްޖުމްހޫރިއްޔާ ވަނީ، ވޭތުވެދިޔަ ސާޅީހަކަށް އަހަރު ދުވަހު އަމަލުކުރަމުން އައި ބޭރުގެ އިންވެސްޓްމަންޓްތަކާ ބެހޭ ގާނޫނު އުވާލައި، ޒަމާނާ އެކަށޭނަ އައު ގާނޫނެއް ތައާރަފުކޮށްފައިވާކަން އިއުލާނުކުރައްވާފައެވެ.
މި އިސްލާހުގެ މައިގަނޑު ބޭނުމަކީ ކަންކަން ހާމަކަން ބޮޑު ގޮތެއްގައި ކުރިއަށް ގެންދިއުމާއި، ސިޔާސަތުތަކުގެ ދެމެހެއްޓެނިވިކަން ކަށަވަރުކޮށް، އިންވެސްޓަރުންގެ އިތުބާރު ބޮޑުކުރުން ކަމުގައި ރައީސް ވިދާޅުވިއެވެ. ހަމައެއާއެކު، ޒިންމާދާރު އަދި ދެފަރާތަށް ފައިދާހުރި ދުރު ރާސްތާގެ އިންވެސްޓްމަންޓްތަކަށް މަރުހަބާ ކިޔުމަށް ރާއްޖެ ފުރިހަމައަށް ތައްޔާރަށް އޮތް ކަމަށާއި، ސަރުކާރުގެ ފަރާތުން ފުރިހަމަ އެއްބާރުލުމާއި އެހީތެރިކަން އަބަދުވެސް ލިބޭނެ ކަމުގެ ޔަގީންކަން އެމަނިކުފާނު ދެއްވިއެވެ.
ރާއްޖޭގެ ތަރައްގީގެ މިސްރާބު ބައްޓަންކުރެވިފައިވާ ގޮތް ތަފްސީލުކޮށްދެއްވަމުން، އިންވެސްޓްމަންޓްތަކަށް ސަރުކާރުން ހާއްސަ އިސްކަމެއްދޭ މުހިންމު ދާއިރާތައް ރައީސުލްޖުމްހޫރިއްޔާ ފާހަގަކުރެއްވިއެވެ. އޭގެ ތެރޭގައި:
- އިއާދަކުރަނިވި ހަކަތައިގެ މަޝްރޫއުތައް
- ކާބޯތަކެތީގެ ރައްކާތެރިކަން ކަށަވަރުކުރުން
- ޒަމާނީ ލޮޖިސްޓިކްސް އަދި ދަތުރުފަތުރުގެ ނިޒާމު
- މަސްވެރިކަމުގެ އުފެއްދުންތަކުގެ އަގު އެއްކުރުން (ވެލިއު އެޑިޝަން)
- ޑިޖިޓަލް ޓެކްނޮލޮޖީ އަދި އާޓިފިޝަލް އިންޓެލިޖެންސް (AI)
- ފެންވަރު ރަނގަޅު ސިއްހީ އަދި މާލީ ހިދުމަތްތައް ފުޅާކުރުން
- ސްމާޓް އިންފްރާސްޓްރަކްޗަރާއި ތިމާވެއްޓާ ރައްޓެހި ދެމެހެއްޓެނިވި ސިޓީތައް ބިނާކުރުން
އުމްރާނީ ތަރައްގީއާއި ޒަމާނީ އީޖާދުތަކުގައި ޗައިނާއިން ހޯދާފައިވާ ބޮޑެތި ކުރިއެރުންތަކާއި ކާމިޔާބީތަކަށް އިޝާރާތްކުރައްވައި ރައީސް ވިދާޅުވީ، މި މުހިންމު ދާއިރާތަކުން ރާއްޖެއާ ގުޅިގެން މަސައްކަތްކުރުމަށް އެންމެ އެކަށޭނަ އަދި ގާބިލު އެއް ބައިވެރިޔަކީ ޝައްކެއްނެތް ގޮތުގައި ޗައިނާ ކަމަށެވެ.
ރާއްޖެއިން އެދޭ އިންވެސްޓްމަންޓްތަކުގެ މަގުސަދަކީ ހަމައެކަނި ފައިސާ ހޯދުން ނޫންކަން ހާމަކުރައްވަމުން، ރައީސުލްޖުމްހޫރިއްޔާ ވިދާޅުވީ ސަރުކާރުގެ އަމާޒަކީ މިފަދަ މަޝްރޫއުތަކުގެ ސަބަބުން ގައުމުގެ އިގްތިސާދީ ބިންގާ ވަރުގަދަވެގެން ދިއުމެވެ.
”އަޅުގަނޑުމެން އެދެނީ ހަމައެކަނި މާލީ އިންވެސްޓްމަންޓްތަކެއް ނޫން. އަޅުގަނޑުމެން ބޭނުންވަނީ އެ އިންވެސްޓްމަންޓްތަކުގެ ސަބަބުން އައު ސިނާއަތްތައް އުފެދި، ދިވެހިންގެ ފަންނީ ގާބިލުކަން އިތުރުވެ، ވަޒީފާގެ އައު ފުރުސަތުތައް ފަހިވެގެން ދިއުން،“ ރައީސް ވިދާޅުވިއެވެ.
މީގެއިތުރުން، ޗައިނާގެ އެހީތެރިކަމާއެކު ރާއްޖޭގައި މިހާތަނަށް ހިންގާފައިވާ ބިޔަ މަޝްރޫއުތަކަކީ ގައުމުގެ އުމްރާނީ ސިފަ މުޅިން ބަދަލުކޮށްލި ތާރީހީ މަސައްކަތްތަކެއްކަން ފާހަގަކުރައްވައި، ދެ ގައުމުގެ ދެމެދުގައި އޮތީ އިތުބާރާއި އިހުތިރާމުގެ މައްޗަށް ބިނާވެފައިވާ ވަރުގަދަ ތާރީހީ ގުޅުމެއްކަން އެމަނިކުފާނު ފާހަގަކުރެއްވިއެވެ.
ރައީސުލްޖުމްހޫރިއްޔާގެ ވާހަކަފުޅު ނިންމަވާލައްވަމުން، މި އިންވެސްޓްމަންޓް ފޯރަމަކީ ހަމައެކަނި ވާހަކަތަކަކަށް ނުހަދައި، ދެ ގައުމުގެ ވިޔަފާރިވެރިން ގުޅިގެން އަމަލީ ގޮތުން ނަތީޖާ ނެރެދޭނެ މުހިންމު މަޝްރޫއުތަކަކަށް މަގުފަހިކުރާ ތާރީހީ ފެށުމަކަށް ހެދުމަށް ވަނީ އިލްތިމާސްކުރައްވާފައެވެ. އަދި އައު އީޖާދީ ވިސްނުންތަކާއެކު، ދެ ގައުމުގެ އިގްތިސާދަށްވެސް ފައިދާކުރާނެ ދެމެހެއްޓެނިވި ގޮތްތަކެއް ހޯދުމަށް ދެ ގައުމުގެ ވިޔަފާރިވެރިންނަށް އެމަނިކުފާނު ބާރުއެޅުއްވިއެވެ.
