މާލެ ސަރަހައްދުގެ ގޭބިސީތަކުގައި ހަރުކޮށްފައިވާ ފެން މީޓަރުތަކުގެ ތެރެއިން ގިނަ 10 އަހަރަށްވުރެ ގިނަ ދުވަސްވެފައިހުރި ފެން މީޓަރުތައް ބަދަލުކުރުމުގެ މަސައްކަތް ފަށައިފިއެވެ.
އެމްޑަބްލިޔުއެސްސީން މިއަދު ފެށި މި މަސައްކަތްތައް ފަށްޓަވައިދެއްވީ އެ ކުންފުނީގެ މެނޭޖިން ޑިރެކްޓަރު ޙަސަން ޝާހު އެވެ.
އެމްޑަބްލިޔުއެސްސީން ހާމަކުރި ގޮތުގައި މި ޕްރޮގުރާމުގެ މަޤުސަދަކީ ޚިދުމަތް ފޯރުކޮށްދޭން ބޭނުންކުރާ ފެން މީޓަރުތައް އެއް ޔުނިފޯމިޓީއަކަށް ބަދަލުކުރުމާއި އެ ކުންފުނީގެ ސްޓޭންޑަޑް ދެމެހެއްޓުމެވެ.
އެމްޑަބްލިޔުއެސްސީން ހާމަކުރާގޮތުގައި މާލެ ސަރަހައްދުގެ ގޭބީސީތަކުގައި ގިނަ ދުވަސްވެ ބާވެފައިހުރި ފެން މީޓަރުތައް ބަދަލުކުރުމުގެ މި ޕްރޮގްރާމް އަހަރު ދުވަހުގެ މުއްދަތަށް ކުރިއަށްދާނެއެވެ.
މި ގޮތުން އަހަރުދުވަހުގެ ތެރޭގައި 15،000 ފެން މީޓަރު ބަދަލުކުރުމަކީ އެ ކުންފުނީގެ އަމާޒުކަމަށް ވެސް ބުނެފައިވެއެވެ.