ގދ. ތިނަދޫން ކޮވިޑަށް ޕޮޒިޓިވްވި އުމުރުން ދުވަސްވީ މީހަކު، ގއ. ވިލިނގިލި ކޮވިޑް ފެސިލިޓީ އަށް ގެންދިއުމަށް ހުރަސްއެޅި މައްސަލަ ހޫނުވެފައިވަނިކޮށް، އެ އަތޮޅު ދާންދޫން އެ ބައްޔަށް ޕޮޒިޓިވްވި ދެ މީހަކު އެ ފެސިލިޓީއަށް ރޭ ބަދަލުކޮށް ފަރުވާދޭން ފަށައިފި އެވެ.
ވިލިނގިލީ ހޮސްޕިޓަލުން މިއަދު ބުނީ ދާންދޫން ކޮވިޑަށް ޕޮޒިޓިވްވި ހައި ރިސްކް މީހަކާއި އެ ބައްޔަށް ޕޮޒިޓިވްވި އިތުރު މީހަކު ރޭ 10:00 ހާއިރު އެ ހޮސްޕިޓަލަށް ގެންގޮސްފައިވާ ކަމަށެވެ. އެއާއެކު ވިލިނގިލި ކޮވިޑް ފެސިލިޓީ އެކްޓިވޭޓްވެފައިވާ ކަމަށް ބުންޏެވެ.
ވިލިނގިލީގައި 23 އެނދުގެ ކޮވިޑް ފެސިލިޓީއެއް ހެދީ ގއ. އަތޮޅާއި ގދ. އަތޮޅުން ކޮވިޑަށް ޕޮޒިޓިވްވެ، އެ ބަލީގައި ބޮޑުވަރުވާ މީހުންނަށް ފަރުވާ ދިނުމަށެވެ. އެކަމަކު ތިނަދޫން ޕޮޒިޓިވްވެ ފަރުވާ އަށް މިދިޔަ ހޯމަ ދުވަހު ވިލިނގިއްޔަށް ފޮނުވި އުމުރުން 68 އަހަރުގެ މީހާ އެ ރަށަށް ނޭރުވުމުން ސަރުކާރަށް ޖެހުނީ އެއާޓެކްސީއެއް ފޮނުވައިގެން އޭނާ މާލެ ގެންނާށެވެ.