ހައްދުފަހަނަ އެޅުމާ ދުރަށްޖެހި، އެމްޑީޕީގެ ވެރިއަކީ ކޮބައިކަން ރައީސް އިބްރާހިމް މުހައްމަދު ސޯލިހުއާ ވާހަކަދައްކައިގެން ނިންމެވުމަށް މާވަށު ދާއިރާގެ މެމްބަރު މުހައްމަދު ސައީދު، ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ގޮވާލައިފިއެވެ.
ސައީދު މިކަމަށް ގޮވާލީ “އިންޑިއާ އައުޓް” ގެ ނަމުގައި ސޯޝަލް މީޑިއާގައި މިހާރު ހިންގަމުން އަންނަ ހަރަކާތުގެ އަޑީގައި ތިބީ ހަރުކަށި ފިކުރުގެ މީހުން ކަމަށް ނަޝީދު ވިދާޅުވުމާ ގުޅިގެންނެވެ.
އެކަމާ ގުޅިގެން ސައީދު ކުރެއްވި ޓްވީޓެއްގައި ވިދާޅުވީ އެންމެ ފުރަތަމަ އިސްލާހުވާންވީ ނަޝީދު ކަމަށާއި އެގޮތުން ހައްދުފަހަނައެޅުމުން ދުރަށްޖެހި ޕާޓީގެ ވެރިއަކީ ކޮބައިކަން ރައީސް އިބްރާހިމް މުހައްމަދު ސޯލިހާއި ވާހަކަދައްކަވައިގެން ނިންމެވުން ރަނގަޅުވާނެ ކަމަށެވެ. އަދި ގައުމީ ކަންކަމުގައި ގޮތް ކިޔާނީ ދިވެހިން ކަމަށްވެސް ސައީދު ވިދާޅުވިއެވެ.
Emme furathama @MohamedNasheed islaahu vaanvee. Ha’dhufahanaa elhumun dhurajjehi, Party ge veriakee kobaikan R.@ibusolih aai vaahaka dhakkavaigen nimmavaa. Gaumee kankamugai goiy kiyaanee dhivehin https://t.co/xGz8EAXqR4
— Mohamed Saeed (@em_saeed) September 13, 2020
އެމްޑީޕީގެ ގައުމީ މަޖިލީހުގެ ވަޓްސްއެޕް ގްރޫޕަށް ނަޝީދު އިއްޔެ ފޮނުއްވި މެސެޖެއްގައި ވިދާޅުވީ ހަރުކަށި މީހުން އަޑީގައި ތިބެގެން ހިންގާ އެ ހަރަކާތަށް ކުރީގެ ރައީސް ޑރ. މުހައްމަދު ވަހީދާއި ޕީޕީއެމުން އެއްބާރުލުންދީ އެ މީހުންގެ ނާޖާއިޒު ފައިދާ ނަގަމުން ކަމަށެވެ.
އެއީ ޕީޕީއެމުން ކުރާ ވަރަށް ދަށު ދަރަޖައިގެ ކަމެއް ކަމަށާއި ރާއްްޖޭގެ މިނިވަންކަން އެންމެ ފަސޭހައިން ގެއްލޭނެ ކަމަކީ ވެސް އެކަމުން ކަމަށް އެމަނިކުފާނު ވިދާޅުވި އެވެ.