ވެލާނާ އިންޓަނޭޝަނަލް އެއާޕޯޓްގެ ކާގޯ ގައި މަސައްކަތް ކުރާ 22 މުވައްޒަފުން ކޮވިޑް-19 އަށް ޕޮޒްޓިވްވެއްޖެއެވެ.
ރޭ ބޭއްވި ނޫސްވެރިންގެ ބައްދަލުވުމެއްގައި ހެލްތް އެމަޖެންސީ އޮޕަރޭޝަން ސެންޓަރުގެ ތަރުޖަމާނު ޑރ.ފާޠިމަތު ނަޒްލާ ރަފީޤު ވިދާޅުވީ އެއާޕޯޓުގެ ކާގޯ ޑިޕާޓްމަންޓުން ފުރަތަމަ މީހަކު ކޮވިޑް-19 އަށް ޕޮޒްޓިވްވެފައި ވަނީ މިމަހުގެ 5 ވަނަދުވަހު ކަމަށެވެ.
އެއަށްފަހު މިމަހުގެ 12 ވަނަ ދުވަހު 5 މީހުން ޕޮޒްޓިވްވެފައިވާ ކަމަށާއި މިމަހުގެ 13 ވަނަ ދުވަހު 6 މީހަކު ފޕޮޒްޓިވްވެފައިވާ ކަމަށް އޭނާ ވިދާޅުވިއެވެ.
އަދި މިމަހުގެ 14 ވަނަ ދުވަހު 7 މީހަކު ޕޮޒްޓިވްވެފައި ވާއިރު އިއްޔެވެސް އިތުރު 3 މީހުން ވަނީ ޕޮޒްޓިވްވެފައެވެ.
ޑރ.ނަޒްލާ ވިދާޅުވީ މިއަދުވެސް އެއާޕޯޓުން 136 ސާމްޕަލް ކޮވިޑް-19 އަށް ޓެސްޓްކުރުމަށް ނަގާފައިވާކަމަށެވެ.