ސަކަރާތަކަށް ހަދާ އެންމެން މަގުމައްޗަށް، ކޮވިޑަށް އީދެއް!

ކޮވިޑް19 ގެ އިތުރު ރާޅެއް އަރާ ސިއްހީ ނިޒާމަށް ނުކަތާވަރަށް ބަލި ފެތުރެން ފެށުމުން އެޗްޕީއޭއިން މިވަނީ ފިޔަވަޅުތައް ހަރުކަށިކޮށްފައެވެ.

ދުވާލަކަށް 200 އެއްހާ މީހުން ކޮވިޑަށް ޕޮޒިޓިވްވެ، ހޮސްޕިޓަލުގެ އެނދުތައް ފުރި، ސިއްޙީ މާހިރުންގެ ކަންބޮޑުވުން އިންތިހާއަށް އުފުލަމުންދާ މި ދަނޑިވަޅުގައި އާންމުންގެ ފަރާތުން ފެންނަނީ ވަރަށް އާދައިގެ މަންޒަރެކެވެ.

ހަވީރު ހަޔަކުން ފަތިހު ހަަޔަކަށް އުޅަނދު ދުއްވުން މަނާކޮށް، ރޭގަނޑު 23:00 ގެ ފަހުން ބޭރަށް ނިކުމެ އުޅުން މަނާކުރުމުން ދިވެހިންނަށް ހީވަނީ ޢީދެއް ލައްވާލިހެންނެވެ.

އިރު އޮއްސުމުން، ޖޯޑު ޖޯޑަށް، ގުރޫޕު ގުރޫޕަށް، މުޅި އާއިލާ އެއްކޮށް ނިކުމެ މަޖީދީ މަގު އެއްކޮޅުން އަނެއްކޮޅަށް ބުރު ޖަހަމުންދާއިރުގައި މި ގަޑިތަކުގައި ވެހިކަލް ދުއްވުން މަނާކުރި ހަގީގީ ސަބަބު ހަމަ ނުވިސްނެނީ ހެއްޔެވެ؟

އެއްބަޔަކު އަނެއްބަޔަކާއި ވާދަށް، މަގުގެ މެދުން، ސަޅި ބައިސާ ކަނޑަމުން ދާއިރުގައި ސިއްޙީ ނިޒާމަށް “ނުޗަލާވަރުގެ” ބުރަކަމެއް އައިސް މި ނިޒާމު ހުއްޓި ފަރުވާދޭން ޖެހޭ އެންމެނަށް ފަރުވާ ނުދެވޭ ހިސާބަށް ގައުމު ދިޔުމުން ދެން ވާނެ ގޮތަކާއި މެދު ހަމަ ވިސްނާލަން ބޭނުންވެސް ނުވަނީހެއްޔެވެ؟ މަޖީދީމަގު ހީވަނީ ނައިޓް މާކެޓެއް ބާއްވައިގެން އުޅޭ ހެންނެވެ.

ވަކިވަގުތަކު ވެހިކަލް ދުއްވުން މަނާކުރީ މީހުން އެއްތަނުން އަނެއްތަނަށް ހެލިފެލިވެ އުޅޭ އުޅުން ހުއްޓުވުމަށެވެ. ވެހިކަލްތައް މަނާކުރުމުން ގިނަ ބަޔަކު ގޭގައި މަޑު ކުރާނެތީއެވެ. އަދި އެކަމުގެ ސަބަބުން ސިއްޙީ މާހިރުންގެ މަސައްކަތަށް ފަސޭހަވެ، ލުއި ލިބި ކޮވިޑް ފެތުރުން ކޮންޓްރޯލު ކުރުމުގައި ހުރި ގޮންޖެހުންތައް ކުޑަވާނެތީއެވެ.

ނަމަވެސް ބައެއް ދިވެހިންނަށް މިކަން ވީ ބޮޑު އީދެއް އައުންފަަދަ ކަމަކަށެވެ. މިކަން ރޭގަނޑު މާލޭގެ މަގުތަކަށް ބަލާލުމުން ޔަގީންކުރެވެއެވެ. އާއިކެވެ. ވެހިކަލްތައް މަދެވެ. ނަމަވެސް މީހުންތައް ފުރި ބާރުވެފައެވެ. ޒުވާން ޖިންސުއްލަތީފުން ދެއަރިއަށް މޭކަޕްކޮށްގެން މަގުގެ މެދުން ދެކޮޅަށް ހިނގާ ނަގަނީއެވެ.

މީހުން މަގުތަކަށް ނުކުންނާތީވެ، އެކަމާއި އެޗްޕީއޭއަށް ޖޯކު ޖަހާ މީހުން ޖޯކު ޖަހަންވީ ފަރުދީ ޒިންމާއެއް ނެތި، އުޅުމެއް އަދަބެސް ސަދަބެއް ނެތް މީހުންނަށެވެ. ކޮންމެ ފިޔަވަޅެއް އެޅިނަމަވެސް އެ ފިޔަވަޅަށް އަމަލު ކުރާނެ ބަޔަކު ނެތް ތަނެއްގައި ބަލިފެތުރުން ކޮންޓްރޯލުކުރަން ދަތިވާނެއެވެ.

މިއަދު މި ފެންނަނީ އެ މަންޒަރެވެ. ކޮވިޑަށް ޚާއްސަކޮށްފައިވާ ހޮސްޕިޓަލުތަކުގެ އެނދުތައް ފުރެނީއެވެ. ކޮވިޑް ޖެހޭ މީހުންގެ އަދަދު އިންތިހާއަށް އިތުރުވަނީއެވެ. ކަންކަން ފާއްލުން ނައްޓައިފިއެވެ. އަޑެއް އަހާނެ ބަޔަކު ނެތެވެ. އެންމެނަށް މިކަން ވެފައިވަނީ ބޮޑު ސަކަރާތަކަށެވެ.