ރައީސް މުހައްމަދު ނަޝީދުގެ ހާލުކޮޅު އަންނަނީ ރަނގަޅުވަމުން ކަމަށައި ބޭނުންވަނީ އަވަހަށް މަސައްކަތަށް އެނބުރި ވަޑައިގަންނަވަން ކަމަށް އެމަނިކުފާނުގެ އާއިލާއިން ބުނެފިއެވެ.
ނަޝީދުގެ ބޭބޭފުޅު ޑރ.އަހުމަދު ނާޝިދު ކުރެއްވި ޓްވީޓެއްގައި ވިދާޅުވީ ނަޝީދާ ވާހަކަ ދެއްކެވި ކަމަށާއި، އެމަނިކުފާނުގެ ހާލުކޮޅު ރަނގަޅުވަމުން އަންނަ ކަމަށެވެ.
އަދި ރައީސް ނަޝީދު މިހާރުވެސް އުޅުއްވަނީ މަސައްކަތްތައް ޕްލޭން ކުރެއްވުމުގައި ކަމަަށް ނާޝިދު ވިދާޅުވިއެވެ.
މިދިޔަ ބްރާސްފަތި ދުވަހުގެ ރޭ ރައީސް ނަޝީދަށް އަމާޒުކޮށް ދިން ޓެރަރިސްޓް ހަމަލާއާއި ގުޅިގެން އެމަނިކުފާނަށް އަންނަނީ އޭޑީކޭގައި ފަރުވާ ދެއްވަމުންނެވެ. ރައިސް ނަޝީދަށް އަމާޒުކޮށް ހަމަލާ ދީފައިވަނީ އެމަނިކުފާނުގެ އަމިއްލަފުޅު ގެކޮޅު ގ.ކެނެރީގެ ހުންނަ ގޯޅިއާ މަޖީދީމަގު ގުޅޭ ކަންމަތީގައި ހުރި ސައިކަލެއްގައި ބޮމެއް ހަރުކޮށްގެންނެވެ. މިހަމަލާއާއި ގުޅިގެން ރައީސް ނަޝީދުގެ ހަށިކޮޅަށް ބޮޑެތި ޒަޚަމްތަކެއް ލިބި، 16 ގަޑިއިރަށްވުރެ ގިނަ ވަގުތު ހޭދަވި ގިނަ ސާޖަރީތަކެއް ވަނީ ހަދާފައެވެ.
advertisment