ކޮވިޑް ޖެހިގެން އިތުރު ދެ ދިވެއްސަކު މަރުވެއްޖެ

ކޮވިޑަށް ފަރުވާ ދެމުން ދިޔަ އިތުރު ދެ މީހަކު މަރުވެއްޖެއެވެ.

އެޗްޕީއޭއިން ބުނީ ހުޅުމާލެ ކޮވިޑު ފެސިލިޓީގައި ފަރުވާ ދެމުން ދިޔަ 58 އަހަރުގެ ފިރިހެނަކާއި އައިޖީއެމްއެޗްގެ އީއާރަށް ގެނައި 81 އަހަރުގެ ދިވެހި ފިރިހެނަކު މަރުވެފައިވާ ކަމަށެވެ. މި ދެމީހުންނާއި އެކު މި ބަލީގައި ރާއްޖެއިން މަރުވި މީހުންގެ އަދަދު ވަނީ 131 އަށް އިތުރުވެފައެވެ.

މި ބަލީގައި ރާއްޖެއިން އިއްޔެ ވަނީ ޖުމްލަ ހަ މީހަކު މަރުވެފައެވެ. އެއީ އުމުުރުން 80 އަހަރުގެ ފިިރިހެނަކާއި، 79 އަހަރުގެ އަންހެނަކާއި 62 އަހަރުގެ އަންހެނަކާއި 68 އަހަރުގެ އަންހެނަކާއި 78 އަހަރުގެ ފިރިހެނަކާއި 66 އަހަރުގެ ފިރިހެނެކެވެ. މީގެތެރެއިން ފަސް މީހަކު މަރުވެފައިވަނީ ހުޅުމާލެ މެޑިކަލް ފެސިލިޓީގައި ފަރުވާ ދެމުންދަނިކޮށެވެ.

ރާއްޖޭގައި މިވަގުތު 23،000 އަށް ވުރެ ގިނަ އެކްޓިވް ކޭސް އުޅޭއިރު، 290 އަށް ވުރެ ގިނަ މީހުންނަށް އަންނަނީ ހޮސްޕިޓަލުގައި ފަރުވާ ދެމުންނެވެ.