ޖިންސީ ގޯނާގެ ދައުވާތަކެއް އުފުލާފައިވާ ކުރީގެ ޓުއަރިޒަމް މިނިސްޓަރު އަލީ ވަހީދުގެ މިއަދު ޝަރީއަތް ކެންސަލް ކޮށްފިއެވެ.
އެ މައްސަލައިގެ އަޑުއެހުމަށް މިއަދު ބޭއްވުމަށް ނިންމައި ކްރިމިނަލް ކޯޓުން ވަނީ ޕްރޮސެކިއުޓާ ޖެނެރަލް (ޕީޖީ) އޮފީހަށް ވެސް އެކަން އަންގައިފައެވެ. ނަމަވެސް މިއަދު 10 ޖަހާއިރު އޮންނާނެ ކަމަށް ކުރިން ބުނި ޝަރީއަތް ކެންސަލްކޮށް އެކަން މިއަދު ހެނދުނު ވަނީ ޕީޖީ އޮފީހަށް އަންގައިފައެވެ.
އޭނާގެ މައްޗަށް ޖިންސީ ގޯނާގެ ބޮޑެތި ދައުވާތަކެއް އުފުލާފައި ވަނިކޮށް ބޭސް ފަރުވާއަށް ރާއްޖޭން ވަޑައިގަތުމަށް ދިން ހަތަރު މަހުގެ މުއްދަތު އިއްޔެ ވަނީ ހަމަވެފަ އެވެ.
އަލީ ވަހީދު ރާއްޖެއިން ބޭރަށް ފުރާވަޑައިގެންނެވި މައްސަލައާއި ގުޅިގެން ސުޕްރީމް ކޯޓާއި ހައިކޯޓުގެ ނިންމުމެއްގައި ދައުވާ ލިބޭ މީހާގެ ޣައިރު ހާޒިރުގައި ޖިނާއީ މައްސަލަތައް ކުރިއަށް ނުގެންދެވޭނެ ކަމަށް ވަނީ ކަނޑައަޅާފަ އެވެ.