ފޭސް ދޭއްގައި ސްކޫލު އެޅުމަށް ތިން ވަނަ ފަހަރަށް ބީލަމަށް ހުޅުވާލައިފި

ހުޅުމާލޭގެ ފޭސް ދޭއްގައި ސްކޫލެއް އެޅުމަށް ތިން ވަނަ ފަހަރަށް ބީލަމަށް ހުޅުވާލައިފި އެވެ.

ހުޅުމާލެ ފޭސް ދޭއްގައި 2 ސްކޫލެއް އަޅައިދޭނެ ބަޔަކު ހޯދުމަށް އެންމެ ފުރަތަމަ އިއުލާނު ކުރީ 2020 ވަނަ އަހަރުގެ ޑިސެމްބަރު މަހުގެ ތެރޭގަ އެވެ. އެ އިއުލާން ބާތިލުކޮށް ދެވަނަ ފަހަރަށް އިއުލާންކުރީ 2021 ވަަނަ އަހަރުގެ އޮކްޓޯބަރ މަހުގެ 5 ވަނަ ދުވަހު އެވެ.

އެހެންކަމުން ފިނޭންސް މިނިސްޓްރީން މިދިޔަ އަންގާރަ ދުވަހު 3 ވަނަ ފަހަރަށް ކޮށްފައިވާ އިއުލާނުގައި ވަނީ، އިންޓަނޭޝަނަލް ކޮންޕެޓެޓިވް ބިޑިންގް (އައިސީބީ) އުސޫލުން ހުޅުމާލޭގެ 2 ވަނަ ފިޔަވަހީގައި 2 ސްކޫލް އެޅުމަށް ޝައުގުވެރިވާ ރާއްޖެއާއި ރާއްޖެއިން ބޭރުގެ ކުންފުނިތަކަށް ފުރުސަތު ހުޅުވާލާފައިވާ ކަމަށެވެ.

ހަމައެގޮތުން، 2 ސްކޫލަށް ވަކިވަކީން ބިޑް ސެކިއުރިޓީ ކަނޑައަޅާފައިވާއިރު އިއުލާނުގައިވާ ގޮތުން 2 ސްކޫލަށްވެސް ބިޑް ސެކިއުރިޓީގެ ގޮތުގައި 850،000 ރުފިޔާ ދައްކަންޖެހެއެވެ. އަދި އެގޮތުން ބީލަމުގައި ބައިވެރިވުމަށް 1،500 ރުފިޔާގެ ރަޖިސްޓްރޭޝަން ފީއެއް ދައްކަން ޖެހެއެވެ.

މީގެއިތުރުން، އިއުލާނުގައި ބުނެފައިވަނީ ބިޑް ހުށަހަޅަންޖެހޭނީ އަންނަ އަހަރުގެ ފެެބްރުއަރީ މަހުގެ 3 ވަނަ ދުވަހު މެންދުރުފަހު 1:00ގެ ކުރިން ފިނޭންސް މިނިސްޓްރީއަސް ކަމަށެވެ.