އައްޑޫ އިކްއެޓޯރިއަލް ހޮސްޕިޓަލް (އޭއީއެޗް) ގައި މިދިޔަ ހަފުތާފައި ސިޒޭރިއަން ހެދި މީހެއްގެ ގޮހޮރު އެތަނުގެ އިހުމާލުން ބުރިވި މައްސަލަ އިތުރަށް ބަލަމުން އަންނަ ކަމަށް ހެލްތު މިނިސްޓްރީން ބުނެފި އެވެ.
ހެލްތު މިނިސްޓްރީން މިރޭ ބުނީ އައްޑޫ އިކްއެޓޯރިއަލް ހޮސްޕިޓަލަކީ މިނިވަން ބޯޑެއްގެ ބެލުމުގެ ދަށުން ހިންގޭ ހޮސްޕިޓަލެއް ކަމަށާއި މިނިސްޓްރީ އަކީ ރާއްޖޭގެ ސިއްހީ ނިޒާމު ރެގިއުލޭޓް ކުރުމުގެ ޒިންމާ ހަވާލް ކުރެވިފައިވާ ފަރާތް ކަމަށެވެ. އެހެންކަމުން އައްޑޫ ހޮސްޕިޓަލްގައި ސިޒޭރިއަން ހެދި މީހަކަށް ދިމާވި ހިތާމަވެރި ހާދިސާ ހިނގާދިޔަ ގޮތް މި މިނިސްޓްރީން ބަލަމުންދާ ކަމަށެވެ.
“އަދި ކަނޑައެޅިފައިވާ އުސޫލު ތަކުގެ ދަށުން އަޅަން ޖެހޭ ފިޔަވަޅުތައް އަޅާނަމެވެ.” މިނިސްޓްރީން ބުނެފައިވެ އެވެ.
އޭނާގެ ހާލު ގޯސްވެގެން މި ވަގުތު އޭޑީކޭގެ އައިސީޔޫގައި ފަރުވާދެމުން އަންނަ އިރު، އޭއީއެޗްގައި ސިޒޭރިއަން ހެދީ މިދިޔަ މަހުގެ 23 ގަ އެވެ. އަދި އަންހެން މީހާގެ ހާލު އަދިވެސަ ސީރިއަސް ކަމަށް އާއިލާ އިން ބުނެ އެވެ.