އެންމެ ގިނަ ވޯޓް ލިބޭ ކެންޑިޑޭޓަށް ރިޔާސީ އިންތިހާބު ކާމިޔާބުވާ އުސޫލަށް ބަދަލުވުން މުހިންމުކަމަށް އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެމްޑީޕީގެ ގައުމީ މަޖިލީހުގެ ބައްދަލުވުމުގައި ވާހަކަފުޅު ދައްކަވަމުން ރައީސް ނަޝީދު ވިދާޅުވީ 30 އިންސައްތައަށްވުރެ ވޯޓު ދަށްވެއްޖެނަމަ އެންމެ ގިނައިން ވޯޓު ލިބޭ 2 ކެންޑިޑޭޓުންގެ މެދުގައި ވޯޓުގެ ދެވަނަ ބުރެއް ބާއްވާގޮތަށް އުސޫލު ބަދަލުކުރުން މުހިންމު ކަމަށެވެ. ރައީސް ނަޝީދުގެ ވާހަކަފުޅުގައި ވަރަށް ބޮޑަށް ބަރުލަމާނީ ނިޒާމަށް ބަދަލުވުމުގެ މުހިންމުކަމަށް ވަނީ އަލިއަޅުއްވާލައްވާފައެވެ.
އެގޮތުން2023 ވަނަ އަހަރުގެ ރިޔާސީ އިންތިހާބަށް ޚާއްސަ އިސްކަމެއް ދީގެން މަސައްކަތް ކުރަންޖެހޭކަން ފާހަގަކުރައްވައި އަންނަ އަހަރަށް މި ޕާޓީ މިސްރާބު ހިފުމަކީ މިގައުމީ މަޖިލީހުގެ އެންމެ ބޮޑު އެއް މަސައްކަތަށް ވާންޖެހޭނެކަމަށް ވިދާޅުވިއެވެ. އަދި ގާނޫނު އަސާސިއަށް ގެންނަންޖެހޭ ބަދަލުތައް މިހާރުވެސް ފާހަގަވަމުންދާކަމަށް ވިދާޅުވިއެވެ.
ރައީސް ނަޝީދު ވިދާޅުވީ ކޮންމެ 5 އަހަރަކުން މަޖިލީހުގެ ގޮނޑި އިތުރުވެގެން ދިއުމަކީ ހަރަދަށް އަންނަ ބުރައެއްކަމަށެވެ. އަދި ބަރުލަމާނީ ނިޒާމެއްގައި އޮންނަ މަޖިލީހަށް ބަދަލުތަކެއް އަންނާނެކަމަށާއި ކޮންގްރެސް ބާއްވާ ގާނޫނު އަސާސީއަށް ގެންނަންޖެހޭ ބަދަލު ގެނައުމަށް މަސައްކަތް ކުރަންޖެހޭކަމަށް ރައީސް ނަޝީދު ވިދާޅުވިއެވެ.