ސްޓެލްކޯގެ މެނޭޖިން ޑިރެކްޓަރުގެ މަގާމުން ވަކިކުރި ހަސަން މުގުނީއަށް އެންވާރަމެންޓް މިނިސްޓްރީގެ ސްޓޭޓް މިނިސްޓަރުކަން ދީފިއެވެ.
ރައީސް އޮފީހުން ވަނީ އެންވާރަމެންޓް މިނިސްޓްރީގެ ސްޓޭޓް މިނިސްޓަރަކަށް މުގުނީ އައްޔަނު ކުރިކަން ހާމަކޮށްފައެވެ.
މުގުނީ އެންމެފަހުން ހުންނެވީ ސްޓެލްކޯގެ އެމްޑީގެ މަގާމުގައެވެ. އެ މަގާމުން މުގުނީ ދުރުކޮށް ސްޓެލްކޯގެ އެމްޑީއަކަށް ހަމަޖައްސާފައިވަނީ އީސީގެ ކުރީގެ ރައީސް އަހުމަދު ޝަރީފުއެވެ.
ހަސަން މުގުނީ ވަނީ މެލޭޝިއާގެ ހެލްޕް ޔުނިވަރސިޓީން ބެޗެލަރ އޮފް ސައިންސް ހާސިލްކުރައްވާ، އެމެރިކާގެ ބްރޭންޑައިސް އިންޓަރނޭޝަނަލް ބިޒްނަސް ސްކޫލުން މާސްޓަރ އޮފް ބިޒްނަސް އެޑްމިނިސްޓްރޭޝަން ފުރިހަމަކުރައްވާފައެވެ.