ކުރިއަށް އޮތް 2023 ގެ ރިޔާސީ އިންތިހާބުގައި ވާދަކުރެއްވުމަށް ނިންމަވާފައިވާ ކުރީގެ ހޯމް މިނިސްޓަރު އުމަރު ނަސީރުގެ ރިޔާސީ ކެމްޕެއިން ހަރަކާތްތައް އަލުން ފަށައިފި އެވެ.
އުމަރު ނަސީރާ ދެކޮޅަށް ދައުވާ ކޮށްދިނުމަށް އޭސީސީން ޕްރޮސެކިޔުޓަރ ޖެނެރަލް އޮފީހަށް މައްސަލައެއް ފޮނުވުމުން އެއަށް އިހުތީރާމް ކުރުމުގެ ގޮތުން ޢުމަރުގެ ރިޔާސީ ކެމްޕޭން ބަނީ ތިން މަހަށް މެދުކަނޑާލާފައެވެ.
އުމަރު ވިދާޅުވީ އެ މައްސަލަ ޕީޖީއަށް ހުށަހެޅިފަހުން މިއަދު ހަވީރަށް ތިންމަސް ވެފައިވާ ކަމަށެވެ. ނަމަވެސް އެއްވެސް ކުށެއް ސާބިތުކޮށް ނުދެވުމުން އަލުން ކެންޕޭން ފެށީ ކަމަށެވެ.
އުމަރުގެ މައްޗަށް ދައުވާކުރަން ފޮނުވީ 2015 ވަނަ އަހަރު ތެރޭގައި، ހޯމް މިނިސްޓްރީން ކުށްވެރިންގެ ފައިގައި ޓެގު އެޅުވުމުގެ މަސައްކަތް ޙަވާލުކުރީ އުމަރާއި ވިޔަފާރީގެ ގޮތުން ގާތްގުޅުން އޮންނަ ފަރާތެއްގެ ކުންފުންޏަކަށް ކަމަށް ބުނާ މައްސަލަ ތަހުގީގު ކުރުމަށްފަހު އެވެ.
އޭސީސީން ހާމަކުރި ގޮތުގައި އުމަރުގެ މައްޗަށް އުފުލުމަށް އެދިފައިވަނީ ރަސްމީ ހައިސިއްޔަތު ނަހަމަގޮތުގައި ބޭނުންކުރުމުގެ ކުށުގެ ދަޢުވާ ކަމަށެވެ.