ކެމްޕެއިންގެ ބައިވެރިންނާއި ވޯޓުދިން ފަރާތްތަކަށް އުމަރުގެ ޝުކުރު!

ރިޔާސީ ކެމްޕެއިންގައި ބައިވެރިވެދެއްވި އެންމެހާ ފަރާތްތަކަށް މިނިވަން ކެންޑިޑޭޓު އުމަރު ނަސީރު ޝުކުރު އަދާކުރައްވައިފިއެވެ.

ހޯމް މިނިސްޓަރެއްގެ މަގާމު އަދާކުރައްވާފައިވާ އުމަރު ނަސީރު 2023ގެ ރިޔާސީ އިންތިހާބުގައި ވާދަކުރެއްވީ މިނިވަން ކެންޑިޑޭޓެއްގެ ގޮތުގައެވެ. އުމަރު ވިއްކެމި މައިގަނޑު ސިޔާސަތުތަކުގެ ތެރޭގައި ރާއްޖޭގައި ބޮޑުވަމުންދާ މަސްތުވާތަކެތީގެ މައްސަލައަށް ހައްލުތަކެއް ގެނެސްދެއްވުމުގެ ސިޔާސަތާއި ހަރުދަނާ ޒުވާނުް ޖީލެއް ބިނާކުރެއްވުމުގެ ސިޔާސަތުތަކުގެ އިތުރުން ދިވެހިރާއްޖޭގައި އިސްލާމީ ޝަޜިއާ އާއި އެއްގޮތުގެ މަތިން ޝަރުއީ ނިޒާމުގެ ތެރެއިން އަމަލުކުރުމުގެ ސިޔާސަތުތައްވެސް ހިމެނެއެވެ.

އުމަރު އަމިއްލަ ސޯޝަލްމީޑިއާ މެދުވެރިކޮށް ކުރެއްވި ޕޯސްޓެއްގައި އޭނާ ވިދާޅުވީ، އިންތިހާބީ ކެމްޕެއިން މަސައްކަތްތަކުގައި ބައިވެރިވެދެއްވި ހުރިހާ ބޭފުޅުންނާއި ވޯޓު ދެއްވި އެންމެހާ ފަރާތްތަކަށް ފަށްފަށުން ޝުކުރު ދަންނަވާކަމަށެވެ.

އަޅުގަޑުމެންގެ މަސައްކަތުގައި ބައިވެރިވެ ދެއްވި ހުރިހާ ބޭފުޅުންނަށާއި، ވޯޓު ދެއްވި ހުރިހާ ބޭފޫޅުންނަށް ފަށްފަށުން ޝުކުރު ދަންނަވަން.

— Umar Naseer (@UmarNaseerMV) September 9, 2023

އުމަރު ނަސީރުގެ ކެމްޕެއިންގެ ބައިވެރިންނާއި ވޯޓު ދެއްވި ފަރާތްތަކަށް ޝުކުރު އަދާކުރެއްވިއިރު، އޭނާ އަށް މި އިންތިހާބުގައި ލިބިވަޑައިގެންނެވީ 6000 އާއި ގާތް ކުރާ އަދަދެއްގެ ވޯޓުކަން ފާހަގަކުރެވެއެވެ.