މާލެ ސިޓީ ކައުންސިލުން ރޯދަ މަހުގެ ކުރިން ބާއްވަން މަސައްކަތް ކުރި “ސިޓީ ނައިޓް މާކެޓް” ނުބާއްވަން ނިންމައިފި އެވެ.
ރޯދަ އަށް ހާއްސަކޮށް މާލޭ ސިޓީ ކައުންސިލުން ބާއްވަން ނިންމި ނައިޓް މާކެޓް ފަށަން ހަމަޖެހިފައި އޮތީ އަންނަ ހޯމަ ދުވަހު އެވެ. ނަމަވެސް ކައުންސިލުން މިއަދު ބުނީ ނައިޓް މާކެޓް ބާއްވަން ވަގުތު ނެތުމުގެ ސަބަބުން ނައިޓް މާކެޓްގެ އެއްވެސް ކަމެއް ކުރިއަށް ނުގެންދިއުމަށް ކައުންސިލުން މިހާރު ނިންމާފައިވާ ކަމަށެވެ.
ސިޓީ ކައުންސިލުން އަންނަނީ ރޯދަ މަހަށް ހާއްސަކޮށްގެން، މާލޭގެ ދެ ސަރަހައްދެއްގައި މޭވާ އާއި ތަރުކާރީ ވިއްކަން ވަގުތީ މާރުކޭޓްތަކެއް ވެސް ހުޅުވަން ތައްޔާރުވަމުންނެވެ. ރޯދަ މަހުގެ ފުރަތަމަ ދުވަހު އެ މާރުކޭޓްތައް ހުޅުވާނީ ދަރުބާރުގޭގެ އިރަށް އޮންނަ ހުސްބިމުގަ އާއި ރަސްފަނު ޕާކިން ޒޯނުގަ އެވެ.
އާ އަހަރާ ދިމާކޮށް ވެސް މާލެ ސިޓީ ކައުންސިލުން ވަނީ މިދިޔަ އަހަރު ޑިސެމްބަރުގައި މާލޭގައި ނައިޓް މާކެޓެއް ބާއްވައިފަ އެވެ.