ހުޅުމާލެ ދެވަނަ ފިޔަވަހީގައި އިމާރާތް ކޮށްފައިވާ ހިޔާ ފްލެޓްތައް ކައިރީ ކާބޯތަކެތި ވިއްކުން ހުއްޓާލައި ތަން ސާފުކުރުމަށް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސި) އިން އަންގައިފިއެވެ.
މީގެ އިތުރުން ހިޔާ ސަރަހައްދުގައި ކާބޯތަކެތީގެ ވިޔަފާރިތައް ކުރަމުން ދަނީ ނަގަން ޖެހޭ އެއްވެސް ހުއްދައެއް ނުނަގައިކަމަށް އެޗްޑީސީގެ ބަޔާނުގައި ވެއެވެ. އެހެން ކަމުން އެ ސަރަހައްދުގައި ބަހައްޓާފައިވާ ކާބޯތަކެތީގެ ހިދުމަތްދޭ ގާޑިޔާ ތަކާއި މޭޒުތައް މި މަހުގެ 10 އެއްގެ ކުރިން ނަގައި ހުސްކޮށް އެ ސަރަހައްދު ހުސް ކުރުމަށް އެޗްޑީސީން ވަނީ އަންގާފަ އެވެ.
އަދި އަންގާފައިވާ ތާރީހުގެ ފަހުން ވެސް ތަކެތި ހުސް ނުކުރާނަމަ އެ ބަޔަކާއި މެދު ފިޔަވަޅު އަޅާނެކަމަށް އެ އިދާރާއިން ބުނެފައި ވެއެވެ.
މިދިޔަ ސެޕްޓެމްބަރު މަހުން ފެށިގެން މީހުން ދިރިއުޅެން ފަށާފައިވާ ހިޔާގެ އެކި ޓަވަރުތަކުގެ ބޭރުގައި ހަވީރު ވަގުތު ހެދިކާ ވިއްކުމުގެ ވިޔަފާރި ގިނަ ބަޔަކު ދަނީ ކުރަމުންނެވެ.
advertisment