ރައީސްގެ ގަރާރު ގާނޫނު އަސާސީ އާއި ހިލާފު: ކުރީގެ އުއްތަމަ ފަނޑިޔާރު

ރާއްޖޭގައަށް އިންޑިއާގެ ނުފޫޒު ވަދެ ގައުމުގެ މިނިވަންކަމަށް ބުރޫއަރަމުންދާކަމަށް ބުނެ އިދިކޮޅުން ކުރިޔަށް ގެންދާ އިންޑިއާ އައުޓް ހަރަކާތަކީ ގައުމީ ސަލާމަތަށް ހުރި ނުރައްކަލެއްގެ ގޮތުގައި ކަނޑައަޅައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ނެރުއްވި ގަރާރު ގާނޫނު އަސާސީއާއި ހިލާފުކަމަށް ކުރީގެ އުއްތަމަ ފަނޑިޔާރު ޑރ.އަހްމަދު އަބްދުﷲ ދީދީ ވިދާޅުވެއްޖެ އެވެ.

ރައީސް ނެރުއްވި ގަރާރާއި މެދު ގާނޫނީ ސުވާލު އުފައްދައި ޑރ. ދީދީ ކުރެއްވި ޓްވީޓުގައި ވިދާޅުވީ ގާނޫނު އަސާސީގެ 115 ވަނަ މާއްދާއާއި ހަވާލާދީ ގަރާރެއް ނެރުމަކީ، ބާތިލު އެއްޗެއް ސައްހަވެގެން ދާނެ ސަބަބެއް ނޫން ކަމަށެވެ. އަދި މި ގަރާރަކީ ގާނޫނާއި ހިލާފު އެންގުމެއްގެ ގޮތުގައި ސިފަކުރަށްވާ ޑރ. ދީދީ ވިދާޅުވީ ދިވެހި ރާއްޖޭގެ ގާނޫނު އަސާސީގެ ބާރު ހިނގާ އެއްވެސް ސަރަހައްދެއްގައި ގަރާރު ތަންފީޒު ނުކުރެވޭނެ ކަމަށެވެ.

ޤާނޫނުއަސާސީގެ 115 ވަނަ މާއްދާޔާ ޙަވާލާ ދިނުމަކުން ބާޠިލް ޤަރާރެއް ޞައްޙަވާނެ ގޮތެއް ނޯންނާނެ. މުޠުލަޤު ސިފައެއްގައި ޤާނޫނުއަސާސީއާ ޚިލާފު، ތިޔަ ޤަރާރަކީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ ބާރު ހިނގާ އެއްވެސް ސަރަޙައްދެއްގައި ޤާނޫނީގޮތުން ތަންފީޒު ކުރެވޭނެ ޤަރާރެއް ނޫން https://t.co/d76qddanST

— Dr. Ahmed Abdulla Didi (@AABDULLADIDI) April 21, 2022

ރައީސް ސާލިހު ސޮއިކުރައްވައި ނެރުއްވައިފައިވާ ގަރާރުގައި ވާނީ ދިވެހި ސަރުކާރުގެ ސިޔާސަތަކީ ގާނޫނު އަސާސީގައިވާ ގޮތުގެ މަތިން ހިޔާލުފާޅުކުމާއި އެއްވެ އުޅުމުގެ މިނިވަންކަމަށް އެންމެ ފުޅާ މިނެއްގައި ތަންދިނުކަމަށްވީ ހިނދު ރާއްޖޭގެ ސުލްހަމަސަލަސްކަން ނަގާލުމުގެ ނިޔަތުގައި މިކަމުގެ ނާޖާއިޒު ފާއިދާތައް “އިންޑިއާ އައުޓް” ކެމްޕެއިންގެ ފަރާތުން ނަގަމުން ދާކަމަށެވެ. އަދި ނަސްލީ ތަފާތުކުރުން ނައްތާލުން ފަދަ އެތަކެއް ބައިންލަންއަގުވާމީ އެއްބަސްވުންތަކެއްގައި ރާއްޖޭގެ ފަރާތުން ސޮއި ކުރެވެފައިވާ ކަމަށާއި އެ މުއާހަދާތަކުގެ ދަށުން މަސައްކަތް ކުރަށްވާ ބޭފުޅުންގެ ސަލާމަތާއި ރައްކާތެރިކަން ކަށަވަރުކޮށްދިނުމަކީ “ހޮސްޓް ނޭޝަން” ގެ ޒިއްމާއެއްކަމުގަ އެވެ.

މީގެ އިތުރުން އިންޑިއާއި ދެކޮޅަށް ކުރިޔަށްދާ މި ކެމްޕެއިން އަކީ ޖާއިޒް މަގްސަދެއް ނެތް ސިޔާސީ މަންފާއަކަށް ހިންގަމުންދާ ހަރަކާތެއް ކަމަށާއި މިފަދަ ކަންކަމަކީ ގާނޫނު ތަންފީޒުކުރާ އިދާރާތަކުން ހުއްޓުވަންޖެހޭ އަމަލުތައްކަމަށް ވެސް ގަރާރުގައި ވެއެވެ.

އިދިކޮޅުން ވަނީ ރައީސްގެ ގަރާރު ބާތިލުކަމަށް ކަނޑައެޅުމަށް މައްސަލަ ކޯޓަށް ހުށަހަޅާނެކަމަށް ހާމަކޮށްފަ އެވެ.