ސިޔާސީ ޕާޓީތަކާއި ގުޅޭ މެމްބަރުންގެ ފޯމުތައް ހުށައަޅާއިރު ފޯމެއް ސައްހަ ނޫންކަމަށް ސާބިތުވެއްޖެ ނަމަ އެ ޕާޓީއެއް ޖޫރިމަނާ ކުރަން އިލެކްޝަންސް ކޮމިޝަނުން ކޮމިޝަނުން ނިންމައިފިއެވެ.
ކޮމިޝަންގެ ނައިބު ރައީސް އިސްމާއިލް ހަބީބު މިއަދު ކުރެއްވި ޓްވީޓެއްގައި ވިދާޅުވީ، އޭޕްރިލް މަހުން ފެށިގެން ސިޔާސީ ޕާޓީތަކުން ހުށައަޅާ ފޯމުތައް ސައްހަ ނޫންކަމަށްވާ ނަމަ، ހުށައެޅިފައިވާ ކޮންމެ ފޯމަކަށް އެ ޕާޓީއެއް 10،000 ރުފިޔާއިން ޖޫރިމަނާ ކުރާނެ ކަމަށެވެ. އަދި ފޯމު ހުށަހަޅާ ޕާޓީގެ ރަޖިސްޓްރާއެއް ވެސް ޖޫރިމަނާ ކުރުމަށް ނިންމާފައިވާކަމަށް ހަބީބު ވިދާޅުވި އެވެ.
އެގޮތުން ފުރަތަމަ ފަހަރަކަށް ރަޖިސްޓްރާއިންނަށް 5،000 ރުފިޔާގެ ޖޫރިމަނާއެއް ކުރަން ނިންމާފައިވާ އިރު، އޭގެ ފަހުން މައްސަަލަ ފާހަގަ ކުރެވޭ ކޮންމެ ފަހަރަކަށް 10،000 ރުފިޔާގެ ޖޫރިމަނާއެއް ކުރާނެކަމަށް ހަބީބު ވިދާޅުވި އެވެ.
2022 އޭޕްރިލް 1 ން ފެށިގެން، ޕާޓީ އަކުން ހުށަހަޅާފައިވާ، ސައްޙަނޫން ކޮންމެ ފޯމަކަށް، ޕާޓީ 10 ހާސް ރުފިޔާ، ރަޖިސްޓްރާ ފުރަތަމަ ފަހަރު 5 ހާސް ރުފިޔާ، ދެވަނަ ފަހަރުން ފެށިގެން 10 ހާސް ރުފިޔާއިން ޖުރުމާނާ ކުރަން ފަށާގޮތަށް މިއަދު ކޮމިޝަނުން ނިންމައިފި.
@ElectionsMv @mvpeoplesmajlis— Ismail Habeeb (@IsmailHabeeb) June 1, 2022
މީގެ އިރުރުން ހަބީބް ވިދާޅުވީ، ސައްހަ ނޫންގޮތަކަށް އަލަށް ގުޅޭ މެމްބަރުންގެ ނަމުގައި ފޯމުތައް ހުށައެޅުން ހުއްޓުވަމަކަށް ގެނައުމަށް ކޮމިޝަނުން ގެނައި ބަދަލުން އެކަށީގެންވާ ހައްލެއް ނުފެންނަ ނަމަ، އަންނަ އޮކްޓޯބަރު މަހުން ފެށިގެން އެފަދަ ފޯމުތަކުގައި ސޮއިކޮށްފައިވާ ހެކިވެރިންވެސް ވަކި ވަކިން 5،000 ރުފިޔާއިން ޖޫރިމަނާ ކުރާނެކަމަށެވެ.
ޞައްޙަ ނޫން ފޯމު ހުށަހެޅުން ހުއްޓުވުމަށްޓަކައި، 1 ޖޫން ގައި ގެނައި ބަދަލުން އެކަށީގެންވާ ޙައްލު ނުލިބޭނަމަ، ފޯމުގައި ސޮއިކުރާ ކޮންމެ ހެކިވެރިޔަކުވެސް 5 ހާސް ރުފިޔާ އިން 2022 އޮކްޓޯބަރ 1 ން ފެށިގެން ޖުރުމާނާ ކުރާގޮތަށްވެސް މިއަދު ކޮމިޝަނުން ނިންމި.@ElectionsMv
@mvpeoplesmajlis— Ismail Habeeb (@IsmailHabeeb) June 1, 2022
އިލެކްޝަންސް ކޮމިޝަންގެ ނައިބު ރައީސް ހަބީބު މިފަދައިން ވިދާޅުވެފައިވާ އިރު، މިފަހަކަށް އައިސް އާއްމުނަށް ނޭނގި އައިޑީކާޑުގައިވާ މައުލޫމާތުތައް ބޭނުންކޮށް އެކި ޕާޓީތަކުގެ ދަށުން ރަޖިސްޓްރީ ކުރަމުންދާކަމުގެ ގިނަ މައްސަލަތައް ފެންމަތިވެފައިވާކަން ފާހަގަ ކުރެވެ އެވެ.
ދާދިފަހުން މަޖިލީހުގައި މި މައުޟޫއަށް ބަހުސްކޮށް ބައެއް މެމްބަރުން ވަނީ، ހައްޖަށް ދިއުމަށް ފައިސާ ދައްކައި ފޯމު ހުށަހަޅާފައިވާ ގިނަ ބައެއް އަދާލަތުގައި ރެޖިސްޓްރީ ކުރި މައްސަލައެއް ފާހަގަކޮށްފަ އެވެ.
ރާއްޖޭގައި މިވަގުތު 11 ސިޔާސީ ޕާޓީއެއް ހިންގާއިރު، ގިނައީ 3000 މެމްބަރުން ހަމަނުވާ ޕާޓީތަކެވެ. އަދި ބައެއް ޕާޓީތަކުގައި ކުއްލި ގޮތަކަށް އަދަދު އިތުރުވި ގޮތާއި މެދު ބައެއް ބޭފުޅުން ސުވާލު އުފައްދާފައި ވެއެވެ.
