ޖަރީމާތައް ޢާންމުވެ، ފެތުރިގެން ދިޔައިރު ހޯމް މިނިސްޓާ ކޮބާ: ޖަމީލް

ޓްވީޓެއް ކުރައްވާ ޖަމީލް މިހެން އައްސަވާފައިވަނީ ރާއްޖޭގެ ނޫސްވެރިއެއް  ޖިންސުން ގުޅުން ހިންގާ ވީޑިއޯއެއް އާންމުވެއްޖެކަމަށް ބުނެފައިވާ ހަބަރެއް ހިއްސާ ކޮށްފައެވެ. ޖަމީލްގެ ޓްވީޓުގައި ވިދާޅުވެފައިވަނީ، ވެރިކަމުގައި ރައީސުލްޖުމްހުރިއްޔާ އިބްރާހީމް މުހައްމަދު ސާލިހު ހުންނެވި ނަމަވެސް ހޯމް މިނިސްޓާ ޝެއިހް އިމްރާންގެ ޒިންމާ އުފުލެއްވުމުގައި ބިރުގަނެގެން ނުވާނެކަމަށެވެ. އަދި މިފަދަ ޖަރީމާތައް އާންމުވެ، ފެތުރިގެން ދިޔައިރު ފުލުހުން ކޮބައިތޯވެސް ޖަމީލް ވަނީ ސުވާލުއުފައްދަވާފައެވެ.

ކުރީގައި ހޯމް މިނިސްޓަރުކަންވެސް ކުރައްވާފައިވާ ޖަމީލް ވަނީ ފޯކަސް ގެއްލި ބާރުގަދަ ފަރާތްތަކާއިމެދު ފިޔަވަޅު ނޭޅިފައިވާކަމަށް ފާހަގަކޮށް މިހާ ހިސާބަށް ހާލަތު ދިޔައިރު ވަޒީރު ކޮބައިތޯވެސް އައްސަވާފައެވެ.

ވެރިކަމުގައި @ibusolih ހުންނެވިޔަސް ހޯމްމިނިސްޓަރ @ShimranAb ޒިއްމާ އުފުއްލެވުމުގައި ބިރުގަނެގެން ނުވާނެ. މިފަދަ ޖަރީމާތައް ޢާންމުވެ، ފެތުރިގެން ދިޔައިރު ފުލުހުން ކޮބައިތޯ؟ ފޯކަސް ގެއްލި،ބާރުގަދަ ފަރާތްތަކާއިމެދު ފިޔަވަޅު ނޭޅިފައި. މިހާސާބަށް ޙާލަތު ދިޔައިރު ވަޒީރު ކޮބާ؟ https://t.co/gAPA9Tmgnn

— Mohamed Jameel Ahmed (@MJameelAhmed) June 25, 2022

ދާދި ފަހުން އެއް ޖިންސުން ގުޅުން ހިންގާ ވީޑިއޯ އާއި ފޮޓޯ އާންމުވެފައިވާއިރު މިކަމުގައި ގައުމުގެ ތިން ބާރުގެ ތެރެއަށް ނިސްބަތްވާ ފަރާތްތަކަށްވެސް ތުހުމަތުކުރެވެއެވެ. އޭގެ ތެރޭގައި ރައްޔިތުންގެ މަޖިލީހުގެ ހެންވޭރު ދެކުނު ދާއިރާގެ މެމްބަރު ހުސައިން ޝަހީމް (އަނދުން ހުސައިން) ކަމަށް ބެލެވޭ ނުވަތަ ތުހުމަތު ކުރާ މީހެއްގެވެސް ބަރަހަނާ ފޮޓޯވެސް ވަނީ ޖަމާއަތް ހަދައިގެން ފާހިޝް އަމަލު ހިންގާކަމަށް ބެލެވޭފަދަ ގޮތަކަށް ލީކްވެ މީސްމީޑިއާގައި ދައުރުވެފައެވެ. އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ކޮށްކޯފުޅު، ވަކީލް ނާޒިމް ސައްތާރުކަމަށް ބެލެވޭ މީހަކުވެސް ކުޑަ ފިރިހެން ކުއްޖަކާއިއެކު އެއް ޖިންސުން ގުޅުހުން ހިންގާ ވީޑިއޯއެއްވަނީ އާންމުވެފައެވެ.

މިކަމާއި ގުޅިގެން ނާޒިމް ސައްތާރު ވަނީ ފުލުހަށްވެސް ހާޒިރު ކުރެވިފައެވެ. ނަމަވެސް ކަމާއި ބެހޭ އިތުރު މައުލޫމާތެއް ފުލުހުން ހިއްސާ ކޮށްފައިނުވާއިރު ނާޒިމް ސައްތާރު ވަނީ އޭނާގެ މައްޗަށް އެއް ޖިންސުން ގުޅުން ހިންގިކަމަށް ކުރެވޭ ތުހުމަތުތައް ދޮގުކޮށްފައެވެ. މައްސަލަ އާއި ގުޅިގެން ނާޒިމް ސައްތާރުގެ ޕާސްޕޯޓްވެސް ހިފަހައްޓާފައިވާއިރު ނާޒިމް ސައްތާރުގެ އިތުރު މައްސަލަތައްވެސް ފުލުހުންދަނީ ތަހުގީގު ކުރަމުންނެވެ.

މީގެ އިތުރުންވެސް އެއް ޖިންސުން ގުޅުން ހިންގާ އިތުރު ވީޑިއޯތައް އާންމުވެފައިވާއިރު ފުލުހުން ދަނީ މި މައްސަލަތައްވެސް ތަހުގީގު ކުރަމުންނެވެ.