ސްރީލަންކާގެ ބޮޑުވަޒީރުގެ ގެކޮޅުގައި ރޯކޮށްލުމަކީ ލަންކާގައި މިހާރު އުފެދިފައިވާ ހަމަނުޖެހުން ހައްލުވުން ނޫންކަމަށް ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
އިއްޔެ ސްރީލަންކާގައި ހިނގި ހަމަނުޖެހުންތަކުގައި އެގައުމުގެ ބޮޑުވަޒީރު ރަނިލް ވިކްރަމަސިންހަ ގެކޮޅުގައި ރޯކޮށްލުމާއި ގުޅިގެން ރައީސް ނަޝީދު ވަނީ އެކަން ހަރުކަށި އިބާރާތުން ކުށްވެރި ކުރައްވާފައެވެ.
Strongly condemn the burning of 🇱🇰 Prime Minister’s family home yesterday. The PM, who’s only been on the job a few weeks, is trying to steer SL out of its current mess. Burning his house down is hardly going to help.
— Mohamed Nasheed (@MohamedNasheed) July 10, 2022
ސްރީލަންކާގެ ހާލަތު ގޯސްވެ، އެ ގައުމު ބަނގުރޫޓުވެފައިވާކަން އިއުލާން ކޮށްފައި ވަނިކޮށް ރައީސް ނަޝީދުވަނީ އެ ގައުމުގެ އިގްތިސޯދީ ހާލަތު ހަމައަކަށް އެޅުވުމަށް އެހީވުމަށް ޝައުގުވެރިކަން ފާޅުކުރައްވިއެވެ. އެ ކަމާއި ގުޅިގެން އަލަށް ބޮޑުވަޒީރު ރަނިލް ވަަނީ ޓްވީޓެއްވެސް ކުރައްވާފައިއެވެ. އެނާ ވިދާޅުވީ، ރައީސް ނަޝީދު އެ ގައުމުގެ ހާލަތު ހަމައަކަށް އެޅުވުމަށާއި އެ ގައުމަށް ބޭރުގެ އެހީ ހޯދައިދިނުމަށް މަސައްކަތްކޮށްދެއްވަން ހުށައަޅާފައިވާ ހުށައެޅުން އެނާ ބަލައިގަންނަކަމަށެވެ.
ސްރީލަންކާގެ އިގްތިސާދީ ހާލަތު ރަނގަޅު ކުރުމަށް އެ ގައުމުގެ ސަރުކާރުގެ އެޑްވައިޒަރުގެ ހައިސިއްޔަތުންވެސް މަސައްކަތްކުރެއްވި ރައީސް ނަޝިދު، އެ ގައުމު ބަނގުރޫޓުވެ، ރައީސް ގޯޓަބަޔާ އަދި، ބޮޑުވަޒީރު ރަނިލްވެސް އިސްތިއުފާ ދެއްވާނެކަމަށް ވިދާޅުވެފައިވާ ދަނޑިވަޅެއްގައި ޓްވީޓެއް ކުރައްވާ ވިދާޅުވީ، އެ ގައުމަށް ދިމާވެފައިވަނީ އިންތިހާއަށް ދަތި ހާލަތެއްކަމަށެވެ. އެހެންކަމުން، މިހާރު އެ ގައުމުގެ ހާލަތުން އަރައިގަތުމަށް އައް ފަރިތަ، އަދި ތަޖުރިބާކާރު މީހެއް ބޭނުންވާކަމަށްވެސް އެ މަނިކުފާނު ފާހަގަކުރެއްވިއެވެ.
ރައީސް ނަޝީދު ސްރީލަންކާގެ އިގްތިސޯދީ އަދި މާލީ ހާލަތު ހަމައަކަށް އަޅުވައިދިނުމަށްގޮސް މަސައްކަތްތަކެއް ކުރައްވަން އެ ގައުމުގައި ދުވަސްތަކެއް ހޭދަ ކުރެއްވި ނަމަވެސް، މީޑިއާ ރިޕޯޓުތައް ބުނާ ގޮތުން، އެ މަނިކުފާނުގެ ގޮވާލުންތަކަށާއި، އެދިލުންތަކަކަށް ބޭރު ދުނިޔެއިންވެސް މާ ބޮޑު ސަމާލުކަމެއް އަދި ކުރިއެރުމެއްވެސް ލިބިފައިނުވެއެވެ.