ލަންކާގެ ހާލަތު ދަނީ ގާތުން ބަލަމުން: އދ

ހަމަނުޖެހުންތައް ބޮޑުވެފައިވާ ސްރީލަންކާގެ ހާލަތު ވަރަށް ގާތުން ބަލަމުންދާ ކަމަށް އދ ގެ ސެކެޓްރީ ޖެނެރަލް އެންޓޯނިއޯ ގުޓަރޭސް ވިދާޅުވެއްޖެއެވެ.

ލަންކާގައި ހަމަނުޖެހުންތައް ބޮޑުވެފައިވާއިރު އެގައުގުގައި މިވަގުތު ރަނގަޅު  ނިޒާމެއްގެ ދަށުން ހިނގާ ސަރުކާރެއްވެސް ނެތެވެ. އާއްމު ރައްޔިތުން ނިކުމެ ރިޔާސީ ގަނޑުވަރު ހިފުމާއެކު ލަންކާގެ ރައީސް ގޮޓަބަޔާ ރާޖަޕަކްސަ ވަނީ ގައުމު ދޫކުރައްވައި ވަޑައިގެންފައެވެ.

އދ ގެ ސެކެޓްރީ ޖެނެރަލް އެންޓޯނިއޯ ގުޓަރޭސް ކުރެއްވި ޓްވީޓެއްގައި ވިދާޅުވީ ލަންކާގައި މިހާރު ހިނގަމުންދާ ހަމަނުޖެހުންތައް އދ އިން ވަރަށް ގާތުން ބަލަމުންދާ ކަމަށާއި އެ މައްސަލަތަކުގެ އަސްލު ސަބަބަށް ހައްލު ހޯދުމަށް މަސައްކަތް ކުރުމަކީ މުހިއްމު ކަމެއްކަމުގައެވެ.

I continue to follow the situation in Sri Lanka very closely. It is important that the root causes of the conflict and protestors’ grievances are addressed. I urge all party leaders to embrace the spirit of compromise for a peaceful and democratic transition.

— António Guterres (@antonioguterres) July 14, 2022

އދ ގެ ސެކެޓްރީ ޖެނެރަލް ވިދާޅުވީ ސުލްހަވެރިި އަދި ޑިމޮކްރަޓިކް އުސޫލުން ވެރިކަމުގެ ބާރުތައް ބަދަލުކުރުމަށް ލަންކާގެ ސިޔާސީ ފަރާތްތަކުން ދޫ ދިނުމުގެ ރޫހުގައި މަސައްކަތް ކުރަންޖެހޭ ކަމަށެވެ.

ލަންކާގެ ހާލަތު ގޯސްވެފައިވާއިރު އެ ގައުމުގެ ރައީސް ގޮޓަބަޔާ ރާޖަޕަކްސަ ވަނީ ގައުމު ދޫކުރައްވައި ސިންގަޕޫރުގެ ހިމާޔަތް ހޯއްދަވާފައިކަމަށް މީޑިއާ ރިޕޯޓްތަކުގައި ބުނެފައިވެއެވެ.

ލަންކާގެ ރައްޔިތުން މިހާރު ދަނީ ބޮޑުވަޒީރު ރަނިލް ވިކްރަމަސިންހަގެ އިސްތިއުފާ އަށް ވެސް ގޮވާލަމުންނެވެ. ލަންކާގައި ކާފިއު އިއުލާންކޮށްފައިވާ އިރު، އެ ގައުމުގެ މަގުތައް ވަނީ ހަލަބޮލިވެފައެވެ. ލަންކާގެ ސިޔާސީ ފަރާތްތަކުން ދަނީ ވަގުތީގޮތުން ވެރިކަމުގެ ބާރުތައް ހަވާލު ކުރާނެ ފަރާތެއް ކަނޑައެޅުމުގެ މަސައްކަތް ކުރަމުން ކަމުގައި ހަބަރުތަކުގައި ބުނެފައިވެއެވެ.