ރައީސް ގޯޓަބަޔާ ރާޖަޕަކްސަ ލަންކާގައި ހުންނެވި ނަމަ ރައީސް ކަމުގެ މަގާމުން އިސްތިއުފާ ނުދެއްވާނެ ކަމަށާއި އިސްތިއުފާ ދެއްވުމުގެ ހުރިހައި ޝުކުރެއް ހައްގު ވަނީ ދިވެހި ސަރުކާރަށް ކަމަށް ރައްޔިތުންގެ މަޖިލީހުގެ ރައީސް ރައީސް މުހައްމަދު ނަޝީދު ވިދާޅުވެއްޖެއެވެ.
އެހެނިހެން ގައުމުތަކުގެ ދާހިލީ ކަންކަމަށް ވަދެވަޑައިގަންނަ ކަމުގެ ފާޑުކިޔުންތައް އަމާޒުވެފައިވާ ދަނޑިވަޅެއްގައި، ސްރީލަންކާގައި ހުދުމުހުތާރު އައިލީ ވެރިކަމެއް ކުރައްވަމުންދިޔަ، ގޮޓަބަޔާ ރާޖަޕަކްސާ މަގާމުން އިސްތިއުފާދެއްވާފައިވާކަމަށް ފާހަގަކުރައްވާ ނަޝީދު ވިދާޅުވީ، ރައީސް ގޯޓަބަޔާގެ އިސްތިއުފާއާއިއެކު، ސްރީލަންކާގެ ރައްޔިތުން އެގައުމުގައި މިވަގުތު ހިނގަމުންދާ ބޮޑެތި ހަމަނުޖެހުންތަކާއި ދުރުހެލިވެގެންދާނެކަމަށް އެނާ އުންމީދު ކުރައްވާކަމަށެވެ.
ސްރީލަންކާގެ ރައީސް ގޯޓަބަޔާގެ އިސްތިއުފާއާއިއެކު، އެގައުމުގެ ރައްޔިތުންނަށް ހަމަޖެހުމެއް ލިބި، ހަމަނުޖެހުންތައް ހުއްޓުމަކަށް އަންނާނެކަމަށް އުންމީދު ކުރައްވާކަމަށް ދޭހަވާ މޭރުމަކުން ވާހަކަދައްކަވަމުން ރައީސް ނަޝީދު ވިދާޅުވީ، އެނާ ގަބޫލު ކުރައްވާ ގޮތުން، ފުރާނައަށް ނުރައްކައުތެރިވެފައިނުވާނަމަ، ރައީސް ގޯޓަބަޔާ އިސްތިއުފާ ނުދެއްވާނެކަމަށެވެ.
މީގެ އިތުރުން ރައީސް ނަޝީދުވަނީ، ރައީސް ގޯޓަބަޔާ، ފިއްލަވައިގެން ރާއްޖެ ވަޑައިގަތުމަށް ރައީސުލްޖުމުހޫރިއްޔާ އިބްރާހިމް މުހައްމަދު ސާލިހުގެ ސަރުކާރުން އެހީ ވެފައިވުމަށް ތައުރީފު ކުރައްވާފައިއެވެ.
ސްރީލަންކާގައި ހުދުމުހުތާރު އާއިލީ ވެރިކަމެއް ކުރެއްވި ރައީސް ގޯޓަބަޔާ ރާޖަޕަކްސާއަށް ތާއިދު ކުރައްވަމުންދިއުމާއި ގުޅިގެން ރައީސް ނަޝީދަށްވަނީ ފާޑުކިޔުންތަކެއް އަމާޒުވެފައިއެވެ. އެގޮތުން ބައެއް ފަރާތްތަކުންވަނީ ރައީސް ގޯޓަބަޔާ، ރައީސް ނަޝީދު ވިދާޅުވާ ހުދުމުހުތާރު ވެރިޔާ ރައީސް މައުމޫން އަބްދުލް ގައްޔޫމަށްވުރެވެސް ހުދުމުހުތާރު ކަމަށް ސިފަ ކުރައްވާފައިއެވެ. އެހެންކަމުން އެނާއަށް ތާއިދު ކުރުމުން ރައީސް ނަޝީދުގެ އަސްލު ކުލަވަރުތައް ފާޅުވެފައިވާކަމަށް ބައެއް ފަރާތްތަކުން ބުނެއެވެ.