ގައުމުގެ ހާލަތު ނުބައި ކުރީ އަމިއްލައަށް، އެކަން އިސްލާހު ކުރަން ބޭނުން މީހެއް ނެތް: އިމްރާން

ގައުމެއްގެ ހާލަތު ރަނގަޅުވާނީވެސް، ނުވަތަ ނުބައިވާނީވެސް އެބަޔަކު އަމިއްލައަށް ހާލަތު ބަދަލުކުރުމުންކަމަށް ހޯމް މިނިސްޓާ އިމްރާން އަބްދުﷲ ވިދާޅުވެއްޖެ އެވެ.

ގިނަ ދުވަސްތަކަށް ފަހު އަނެއްކާވެސް މިއަދު ޓުވީޓެއް ކުރައްވައި އިމްރާން ވިދާޅުވީ، ރާއްޖޭގައި ރަނގަޅު ނުވަތަ އިސްލާހު ކުރަން ހުރި ކަންކަން ވަރަށް ގިނަކަމަށެވެ. ނަމަވެސް ހަގީގަތުގައި އެކަންތައްތައް އިސްލާހު ކުރަން މަސައްކަތް ކުރަނީ ކޮން ބައެއްތޯ އިމްރާން ވަނީ ސުވާލުކުރައްވާފަ އެވެ.

Qaumehge haalath rangalhuvaaneeves,nuvatha nubaivaaneeves ebayaku amilla ah haalath badhalukurumunneve.Raajjeygai rangalhu nuvatha ISLAAHU kuran huri kan kan vv ginaeve.Namaves haqeegathugaives ISLAAHU kuran masahkaiy kuranee kithah meehun heyyeve?

— Imran Abdulla (@ShimranAb) August 9, 2022

އިމްރާނަކީ ފުލުހުންގެ މުއައްސަސާ އަދި ގާނޫނު ތަންފީޒު ކުރުމުގެ ޒިންމާ އޮތް ގިނަ މުއައްސަސާތަކެއްގެ ބަލަދުވެރި ވަޒީރެވެ. އެހެންކަމުން މިކަންކަމުގެ ޒިންމާ ނަގާ އިސްލާހު ކުރަން ޒިންމާމަތިވެފައިވާ ބޭފުޅަކީ އިމްރާންކަމަށް ގިނަ ބަޔަކު ފާހަގަކުރައްވަ އެވެ.

އޭނާ މިފަދައިން ޓުވީޓު ކުރުމުގެ ސަބަބެއްކަމުގައި ދާދި ފަހު ހިގައި ދިޔަ މަރުގެ ހާދިސާކަމުގައި ބެލެވެއެވެ. މަރު ހިގައިދިޔަތާ 24 ގަޑިއިރަށްވުރެ ގިނަ އިރުވީއިރުވެސް ހޯމް މިނިސްޓާ އިމްރާން އަބްދުﷲ އެއްވެސް އެއްޗެއް ވިދާޅުނުވުމުގެ ސަބަބުން އިމްރާނަށް ވަނީ ގިނަ ފާޑުކިޔުންތަކެއް އަމާޒުވެފައެވެ.