ހުތުރުކަންކަމާ ފާހިޝް އަމަލުތައް ނުހުއްޓިގެން އުޅެނީ ގާނޫނެއް ނެތިގެން ނޫން ކަމަށާއި އެކަމުގެ މައްސަލަ އަކީ ގާނޫނު ތަންފީޒުކުރުމުގައި ތަފާތު ގެންގުޅުންކަމުގައި މެދުހެންވޭރު ދާއިރާގެ މެމްބަރު އަލީ އާޒިމް ވިދާޅުވެއްޖެއެވެ.
އާޒިމް ހޯމް މިނިސްޓަރު އިމްރާން އަބްދުﷲ އަށް އަމާޒުކުރައްވައި ކުރެއްވި ޓްވީޓްގައި ވާ ގޮތުން މަޖިލިސް ޗުއްޓީ ކުރުކޮށްލާފައިވެސް ކިތަންމެ ގާނޫނެއް ގާނޫނު ތަންފީޒުކުރުމަށް ހެދިފައިވާނެ ކަމަށާއި ކޮންމެ ކަމަކުން ރެކެން ނޫޅުއްވުމަށް ވަނީ ގޮވާލައްވާފައެެވެ.
އޮންލައިން މީޑީއާތަކާއި، ސޯޝަލް މީޑިއާ ޕްލެޓުފޯމުތަކުގައި ފާހިޝް އަމަލުތައް ހިންގާ މަންޒަރުތައް ދައްކުވައިދޭ ގިނަ އަދަދެއްގެ ވީޑިއޯތަކެއް ދައުރުވަމުންދާ ދަނޑިވަޅެއްގައި ފުލުހުންގެ މުއައްސަސާއަށް އެ އަމަލުތައް ހިންގަމުންދާ ފަރާތްތައް ހުއްޓުވެން ނެތްކަމަށް ދޭހަވާ މޭރުމަކުން ވާހަކަދައްކަވަމުން އިމްރާން ވިދާޅުވީ، އެފަދަ މަންޒަރުތައް ފަތުރާ ފަރާތްތަކުގެ މައްޗަށް ފިޔަވަޅު އެޅޭނެ ނިޒާމެއް ގާނޫނީ އޮނިގަނޑުގެ ތެރެއަށް ވުޖޫދު ނުކުރެވިއްޖެނަމަ، ދިވެހިރާއްޖޭގެ އިޖްތިމާއީ އަޚްލާގިއްޔަތު އެއްކޮށް، ފުނޑުފުނޑު ވެގެން ހިނގައިދާނެކަމަށެވެ.
ހުތުރު ކަންކަމާ ، ފާހިޝް އަމަލުތައް ނުހުއްޓިގެން އުޅެނީ
ގާނޫނެއް ނެތިގެނެއް ނޫން. ތިގޮތައް ވިދާޅުވެގެން މަޖްލިސް
ޗުއްޓީ ކުރުކޮށްލާފަވެސް ކިތަންމެ ގާނޫނެއް ހަދައިދީފިން.
ކޮންމެ ކަމަކުން ރެކެންނޫޅުއްވާ. މައްސަލައަކީ ގާނޫނު
ތަންފީޒް ކުރުމުގައިވެސް ތަފާތުކުރުން ގެންގުޅުން. https://t.co/8aR69k3Mxq
— 𝐀𝐥𝐢 𝐀𝐳𝐢𝐦 (@aliaazim) August 11, 2022
އޮރިޔާން ކާޑު ފަތުރަމުންދާ ފަރާތްތަކުގެ މައްޗަށް ގާނޫނީ އިމުގެ ތެރެއިން ފިޔަވަޅު އެޅެން ނެތްކަމަށް އިމްރާން ފާހަގަކުރެއްވި އިރު، އަލްގިރިއާއިއެކު އެއްޖިންސުން ގުޅުން ހިންގި މައްސަލައިގައި ހައްޔަރު ކުރެވިފައިވާ ބައެއް ފަރާތްތައް ބޭރު ގައުމުތަކަށް ފުރައިގެން ގޮސްފައިވާކަމަށް އަޑު ފެތުރުމުން ރައްޔިތުން ދަނީ އެކަމާއި ކަންބޮޑުވުން ފާޅުކޮށް، ފާޑުކިޔަމުންނެވެ. އެގޮތުން އެ މައްސަލައިގައި މިހާތަނަށް 18 މީހަކުގެ ޕާސްޕޯޓު ހިފަހައްޓާފައިވާއިރު، އުމްރާއަށް ދިއުމަށް އޭގެ ތެރެއިން ދެ ފަރާތަކަށް ފުލުހުންގެ މުއައްސަސާއިންވަނީ ޕާސްޕޯޓު އަނބުރާ ރައްދުކޮށްދީފައެވެ.
އަލަމްގިރި އާއެކު އެއްޖިންސުން ގުޅުން ހިންގި ކަމުގެ ތުހުމަތުގައި ހަތަރު މީހަކު މިހާތަނަށް ހައްޔަރުކޮށްފައިވާއިރު އެމީހުންގެ ތެރޭގައި ކުރީގެ ރައީސް މުހައްމަދު ނަޝީދުގެ ކޮއްކޮ ނާޒިމް ސައްތާރާއި ނޮޅިވަރަމް ދާއިރާގެ ކުރީގެ މެމްބަރު މުހައްމަދު ނަޝީދުގެ އިތުރުން ފުލުސް އޮފިސަރަކާއި ނޫސްވެރިޔެއް ހިމެނެއެވެ.
މީގެ އިތުރުން ސަރުކާރުގެ އެކި ވުޒާރާތަކުގައި މަސައްކަތް ކުރާ ބައެއް ފަރާތްތައް ވަނީ އެއްޖިންސުން ގުޅުން ހިންގި މައްސަލައިގެ ތުހުމަތުގައި ސަސްޕެންޑް ކޮށްފައެވެ. އޭގެ ތެރޭގައި ހޯމް މިނިސްޓްރީގެ މުވައްޒިފަކާއި ރައްޔިތުންގެ މަޖިލީހުގެ އިދާރާގެ މުވައްޒަފަކާއި ޓީޗަރުން ތަކެއްގެ އިތުރުން ކީރިތި ގުރުއާނާއި ބެހޭ މަރުކަޒުގައި މަސައްކަތް ކުރި ފަރާތެއް ހިމެނެއެވެ.
advertisment