ސިރާޖު ރައީސް ޔާމީން އަށް: ފުލުހުންގެ ހިދުމަތް އިސްލާހު ކުރާ ވާހަކައަކީ ވެރިކަން ނިމުނީމަ ދައްކަން އޮންނަ ވާހަކައެއް ނޫން

ފުލުހުންގެ ހިދުމަތް އިސްލާހު ކުރާ ވާހަކައަކީ ވެރިކަން ނިމުނީމަ ދައްކަން އޮންނަ ވާހަކައެއް ނޫންކަމަށް ފޮނަދޫ ދާއިރާގެ މެމްބަރު މޫސާ ސިރާޖު ވިދާޅުވެއްޖެއެވެ.

އިދިކޮޅުގެ ރިޔާސީ ކެޑިޑޭޓު ރައީސް އަބްދުﷲ ޔާމީން އަބްދުލްގައްޔޫމް ނޫސްވެރިންނާއި ބައްދަލުކުރައްވާ ފުލުހުންގެ ހިދުމަތް އިސްލާހު ކުރަންޖެހިފައިވާ ކަމުގެ ވާހަކަދެއްކެވުމުން އެކަމާއި ގުޅިގެން ކުރެއްވި ޓުވީޓުގައި ސިރާޖު ވިދާޅުވެފައިވަނީ، ފުލުހުންގެ ހިދުމަތް އިސްލާހު ކުރަންޖެހިފައިވާ ކަމުގެ ވާހަކައަކީ ކޮންމެ ވެރިޔަކު ވެރިކަން ނިމުނީމަ ދައްކަން އޮންނަ ވާހަކައެއްގެ ބަދަލުގައި، އިހްލާސްތެރިކަމާއެކު މުޖުތަމައުގެ އެންމެންގެ ސަލާމަތާއި ރައްކާތެރިކަމަށްޓަކައި ފުލުހުންގެ ހިދުމަތް އިސްލާހު ކުރަންޖެހޭކަމަށެވެ.

ފުލުހުންގެ ހިދުމަތް އިސްލާހު ކުރަންޖެހިފައިވާ ކަމުގެ ވާހަކައަކީ ކޮންމެ ވެރިޔަކު ވެރިކަން ނިމުނީމަ ދައްކަން އޮންނަ ވާހަކައެއްގެ ބަދަލުގައި، އިހްލާސްތެރިކަމާއެކު މުޖުތަމައުގެ އެންމެންގެ ސަލާމަތާއި ރައްކާތެރިކަމަށްޓަކައި ފުލުހުންގެ ހިދުމަތް އިސްލާހު ކުރަންޖެހޭ. pic.twitter.com/q4apQmX94d

— Moosa Siraj (@MoosesSiraj) August 11, 2022

ދިވެހިރާއްޖޭގައި ގިސާސް ނުހިފޭ ސަބަބެއްކަމުގައިވެސް ރައީސް ޔާމީން ދެއްކެވީ ފުލުހުންގެ މުއައްސަސާގައި ހުރި މައްސަލަތަކެވެ.

އެމަނިކުފާނު ސުވާލުއުފެއްދެވީ ދިވެހިރާއްޖޭގައި ކުރެވޭ ޖިނާއީ ތަހުގީގުތަކާއިމެދު ރައްޔިތުންގެ އެއްވެސް އިތުބާރެއް އެބައޮތްކަމާއިމެދުގައެވެ. ތަހުގީގުގެ ފޭރާން ދަށްކަމަށް ރައީސް ޔާމީން ފާހަގަކުރެއްވިއެވެ.