ވ އާރަށުގެ މައްސަލައިގައި ކުރީގެ ރައީސް ޔާމީންގެ މައްޗަށް އުފުލާފައިވާ ދައުވާތަކާއި ގުޅިގެން އެމްއެމްޕީއާރުސީގެ ކުރީގެ އެމްޑީ އަބްދުﷲ ޒިޔަތާއި ކުރީގެ ނައިބު ރައީސް އަހުމަދު އަދީބުގެ ހެކިބަސް އެއްދުވަހެއްގައި ނެގުމަށް ކްރިމިނަލް ކޯޓުން ނިންމައިފިއެވެ.
އާރަށް ކުއްޔަށްދިން މައްސަލައިގައި ދައުލަތުން ކުރީގެ ރައީސް ޔާމީންގެ މައްޗަށް ކުރާ މަނީ ލޯންޑަރިން އާއި ރިޝްވަތު ގަބޫލުކުރި ކަމުގެ ޝަރީއަތުގައި ކުރިން ނިންމާފައި އޮތީ ޒިޔަތުގެ ހެކިބަސް ނެގުމަށެވެ. ނަމަވެސް އެ މައްސަލައިގައި ދައުލަތުން ދައުވާ ކުރާ ދެވަނަ ފަރާތް ކަމުގައިވާ ފެލިދު ދާއިރާގެ ކުރީގެ މެމްބަރު ޔޫސުފް ނައީމް އާއި ރައީސް ޔާމީންގެ ވަކީލުން މިއަދުގެ އަޑުއެހުމުގައި އެދުނީ އަދީބާއި ޒިޔަތުގެ ހެކިބަސް އެކުއެކީ ނެގުމަށެވެ. އެކަމުގެ ސަބަބެއް ކަމުގައި ދިފާއީ ވަކީލުން ވިދާޅުވެފައިވަނީ ޒިޔަތާއި އަދީބުގެ ހެކިބަސް ދެ ދުވަހެއްގައި ނަގައިފިނަމަ އެއް ހެކިވެރިއެއްގެ ފަރާތުން އަނެއް ހެކިވެރިޔާ ބުނާ ބަސްތަކަށް ނުފޫޒު ފޯރާ ވަކި ގޮތަކަށް ފަރުމާވެދާނެ ކަމަށް ފެންނާތީއެވެ.
އެކަމަށް އިއުތިރާޒުކޮށް ދައުލަތުން ބުނެފައިވަނީ އެ މައްސަލައިގެ ހެކިބަސް ނެގުމުގެ އަޑުއެހުންތައް ކުރިއަށްދާއިރު އަޑުއެހުން ބޭއްވޭ ކޮންމެ ދުވަހަކު ހާޒިރުކުރެވޭނީ އެއް ހެކިވެރިއެއްކަން ޝަރީއަތުން ކުރިން އިއުލާންކޮށްފައިވާ ކަމަށާއި ދެހެކިން އެއްކޮށް ހާޒިރުކޮށްދޭން ދިފާއުން އެދިފައިވާކަން ކުރިން ދައުލަތަށް އެނގިފައިނުވާ ކަމަށެވެ.
ނަމަވެސް ދިފާއުން އެގޮތަށް އެދުމުން ދައުލަތުން އެކަމަށް އިއުތިރާޒު ކޮށްފައިނުވުުމުން މައްސަލަ ބައްލަވާ އިސްގާޒީ އަހުމަދު ޝަކީލް ނިންމެވީ އަދީބާއި ޒިޔަތުގެ ހެކިބަސް އެކުގައި ނެގުމަށެވެ.
ވުމާއެކު އެދެމީހުންގެ ހެކިބަސް ނެގުމަށް ބާއްވާ އަޑުއެހުން ވަނީ މި މަހުގެ 30 ވަނަ ދުވަހު ބޭއްވުމަށް ތާވަލުކޮށްފަ އެވެ.
2 Responses
ޚިޔާލަކީ މި2މީހުން އެކީ ގެނަޔަސް ވަކިވަކިން މަހަކު މީހަކު ގެނެޔަސް މިކަމުގައި ނުފޫޒު ނެތްގޮތެއް ނޯންނާނެކަން މީ “އެއްގަލުން ފެހިކާ 2ރޮނޑު”ވިއްޔަމިހާރުވެސް އޮންނާނީ ރާވާ ނިންމާފަ.
މިކަމުގައި މި2މީހުން އެއްކޮށް ގެނަޔަސް ވަކިވަކިން މަހަކު މީހަކު ގެނަޔަސް ވާނީހަމަ އެއްގޮތް މީ”އެއްގަލަކުން ފެހިކާ2ރޮނޑު” ވިއްޔާ!މިހާރުވެސް ހަދާނެއެއްޗެއް އޮންނާނީ ހަދާފަ.