އިމްރާންގެ ބޮޑު ސުވާލު: ރައްޔިތުން ބަލައިގަންނަ އެއްޗެއް ވިއްކާނީ ކޮން ޕާޓީއެއް!

2023 ގެ އިންތިހާބަށް ސިޔާސީ ޕާޓީތަކުން މަސައްކަތް ފެށިއިރު، ރައްޔިތުން ބަލައިގަންނަ ސިޔާސަތެއް ވިއްކާނީ ކޮން ޕާޓީއެއްތޯ ސަރުކާރު ކޯލިޝަނުގައި ހިމެނޭ އަދާލަތު ޕާޓީ އަދި ހޯމް މިނިސްޓަރު އިމްރާން އަބްދުﷲ ވިދާޅުވެއްޖެ އެވެ.

ރިޔާސީ އިންތިހަބާއި ދެމެދު މަދު ދުވަސްތަކެއް ބާކީ އޮތްއިރު، މިހާތަނަށް އިންތިހާބުގެ މަސައްކަތްތައް ފަށައި ކެނޑިޑޭޓު އިއުލާނު ކުރި ހަމައެކަނި ޕާޓީއަކީ އިދިކޮޅު ކޮންގްރެސް ކޯލިޝަނެވެ. ނަމަވެސް އިމްރާންގެ ޓުވީޓު އަމާޒު ކުރެއްވީ އިދިކޮޅަށްކަމަށް ނުބެލެވެ އެވެ. އެއީ އިމްރާން ޓުވީޓު ކުރައްވާފައި ވަނީ ސަރުކާރުގެ މައި ޕާޓީ އެމްޑީޕީގެ ކޮންގްރެސް ނިމުނުތާ މާ ގިނައިރުތަކެއް ނުވެކަމަށް ވުމުންނެވެ.

ބޮޑެތި ކޯޅުންތަކާއި ދެބަސްވުންތައް ފެނިގެންދާނެކަމަށް ބެލެވުނު ކޮންގްރެސް އެފަދަ ކަމެއް ނުހިނގައި ނިންމާލެވުން އެއީ ލިބުނު ކާމިޔާބީއެއްކަމަށް ޕާޓީގެ ލީޑާޝިޕުން ވަނީ ކޮންގްރެސް ނިންމާލުވުމުގެ ރަސްމިއްޔާތުގައި ފާހަގަކޮށްފަ އެވެ. އަދި އިއްޔެ ކޮންގްރެސް ނިންމަވާލެއްވުމުގެ ކުރިން ރައީސް އިބްރާހިމް މުހައްމަދު ސޯލިހު ވިދާޅުވީ އެމްޑީޕީއަށް 2023 ކާމިޔާބު ކުރެވޭނެކަމުގެ ފުރިހަމަަ ޔަގީންކަން އެބައޮތް ކަމަށެވެ.

ކޯލިޝަނާއި އެކު ކުރިޔަށް ދިއުމުގެ ވިސްނުން ގެންގުޅުއްވި ރައީސް ސޯލިހު އިއްޔެ “ސަންގު” އަށް ވިދާޅުވީ ދައުރު ނިމޭއިރު ކޯލިޝަން އެކުގައި އޮވެދާނެކަމަށް ނުބެލެވޭކަމަށެވެ. ސަބަބެއްކަމަށް ވިދާޅުވީ އެހެން ޕާޓީތަކުން ވެސް ރިޔާސީ އިންތިހާބުގެ ތައްޔާރީތައް ފަށައި ކެނޑިޑޭޓެއް ދެއްކުމެވެ.

އިންތިހާބާއި މެދު ޕާޓީތަކުން ގޮތެއް ނިންމާނެކަމަށް ބެލެވިފައިވާ ވަގުތެއްގައި ޓުވީޓެއް ކުރައްވައި އިމްރާން ވިދާޅުވީ، ރިޔާސީ އިންތިހާބުގެ ކުލަތައް މަޑުމަޑުން ފެންނަން ފަށާފައިވާކަމަށެވެ. އަދި އެކި ޕާޓީތަކުން އެކި ސިޔާސަތުތައް ވިއްކަމުންދާއިރު ކޮންމެ ޕާޓީއެއްގެ ވެސް ވިސްނުން ތަފާތުވާނެކަން ރައްޔިތުންނަށް އެނގޭކަމަށް އިމްރާން ވިދާޅުވި އެވެ.

2023 ge manzarugai madu madun kula jehen feshee’eve.eki party thakun vikkanee eki ehchethikan rayyithunnah enge’eve.enme gina rayyithun balaiganna ehcheh vikkenee kon party akun kon candidate akah heyyeve?

— Imran Abdulla (@ShimranAb) August 21, 2022

އަންނަ ރިޔާސީ އިންތިޚާބުގައިވެސް ކޮންމެވެސް ކެންޑިޑޭޓަކާއެކު އަދާލަތުން ކޯލިޝަން ހަދައި ސަރުކާރުން ގޮނޑިތަކެއް ކަށަވަރުކުރުމަށް މަސައްކަތް ކުރާނެކަމަށް ގިނަ ބަޔަކު ޤަބޫލުކުރެއެވެ.