އިންޑިއަކީ ރާއްޖެއާއި އެންމެ ގާތް ގުޅުން އޮތް ގައުމު ގޮތުގައި އޮންނާނެކަމަށްވީނަމަވެސް، ޗައިނާއާއި އެކުވެސް އެކުވެރި އަދި އިގްތިސާދީ ގުޅުންތައް ބާއްވާނެކަމަށް ފޮރިން މިނިސްޓަރ އަދި އދގެ އާންމު މަޖިލީހުގެ ރައީސް އަބްދުﷲ ޝާހިދު ވިދާޅުވެއްޖެއެވެ.
ބޭރުގެ ނޫހަކަށް ދެއްވި އިންޓަރވިއުއެއްގައި ޝާހިދު ވިދާޅުވީ، ދިވެހިރާއްޖެއިން އަބަދުވެސް އެންމެ ގާތް ގައުމުގެ ގޮތުގައި އިންޑިއާ ދެކޭނެކަމަށެވެ. އެހެން ނަމަވެސް، ޗައިނާ ފަދައިން ދިވެހިރާއްޖެއާއި ގާތުން މަސައްކަތް ކޮށް، އެހީތައް ފޯރުވަމުންދާ ގައުމުތަކާ އެކު ގުޅުންތައް ދަމަހައްޓާނެކަމަށްވެސް އެމަނިކުފާނު ވިދާޅުވިއެވެ.
އިންޑިއާ އަދި ރާއްޖޭގެ ގުޅުން ދުވަހަކުން ދުވަހަކަށް ވަރުގަދަވަމުން އަންނަ ކަމަށާއި، ދެގައުމުގެ އިސްވެރިން ގާތުން މަސައްކަތްކުރާކަމަށް ޝާހިދު ފާހަގަކުރެއްވިއެވެ. އެމަނިކުފާނު ވިދާޅުވީ، އިންޑިއާ ފެނިގެން އައިސްފައިވަނީ، ރާއްޖެއަށް ދިމާވާ ކަންކަމުގައި އެންމެ ފުރަތަމަ އެހީ ފޯރުވައިދޭ ގައުމު ގޮތަށް ކަމަށެވެ. އަދި އެގޮތަށް ކަން ދިމާވާ ސަބަބަކީ، އެންމެ ގާތުގައި އޮތް ގައުމަށްވުމުންކަމަށްވެސް ޝާހިދު ސިފަކުރެއްވިއެވެ.
![](https://sangu.mv/wp-content/uploads/2022/09/abs-about-china-300x210.png)
ޝާހިދު ވިދާޅުވީ، ރާއްޖޭގައި އިދިކޮޅު ކޮންގްރެސް ކޯލިޝަނުން އިސްނަގައިގެން ހިންގާ “އިންޑިއާ އައުޓް” ކެމްޕެއިނަކީ، ކުރިއެރުމެއް ނެތް މަސައްކަތެއްކަމަށެވެ. އަދި އެކަމުގެ ހަމަ އެކަނި މަގުސަދަކީ، ރާއްޖެއާއި އެންމެ ގާތްކޮށް އޮތް ގައުމާއި ދެކޮޅަށް، ރައްޔިތުންގެ ތެރޭގައި ޖަޒުބާތުތަކެއް އާލާ ކުރުމަށް ކަމަށްވެސް އެ މަނިކުފާނު ފާހަގަކުރެއްވިއެވެ.
މީގެ އިތުރުން ޝާހިދު ވިދާޅުވީ، އިންޑިއާ އާއި ދެކޮޅަށް ކެމްޕެއިނެއް ހިންގަމުންދަނީ، ގައުމަށްޓަކައި ފައިދާ ހުރި އެއްވެސް ކަމެއް ކޮށްދެވެން ނެތް ބައެއް ކަމަށެވެ. އެހެންކަމުން އެކަން ކުރަމުން އަންނަނީ ކޮންމެވެސް ކަމެއް ކުރުމަށްކަމަށްވެސް އެމަނިކުފާނު ވިދާޅުވިއެވެ.
ޝާހިދު ވިދާޅުވީ، ކުރިއަށް އޮތް ރިޔާސީ އިންތިހާބުގައި ރައީސް ސާލިހަށް ދެވަނަ ދައުރެއް ލިބިވަޑައިގަންނަވާނެކަމަށެވެ. އަދި ރައްޔިތުން އެ މަނިކުފާނު ކުރެއްވި މަސައްކަތްތައް ބަލައިގަންނަ ކަމަށްވެސް އެމަނިކުފާނު ފާހަގަކުރެއްވިއެވެ.