ރައީސް އިބްރާހިމް މުހައްމަދު ސާލިހުވަނީ ޗީފް ޑިޕްލޮމެޓުގެ ހައިސިއްޔަތުން ދަތި ދުވަސްތަކެއްގެ ތެރޭގައި ދިވެހިރާއްޖޭގެ ހާރިޖީ މަސައްކަތްތައް އެކަށީގެންވާ މިސްރާބެއްގައި ބެހެއްޓުމުގައި ފުރިހަމަަ މަސައްކަތްތަކެއް ކުރައްވާފައިކަމަށް ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެއެވެ.
ސަރުކާރު ބަދަލުވުމަށް މަދުވަގުތުތަކަށް ވެފައިވާއިރު، ކުރެއްވި ޓްވީޓެއްގައި މިނިސްޓަރު ވަނީ، ރައީސް ސާލިހަށް ތައުރީފުކުރައްވާފައެވެ. އެގޮތުން ޗީފް ޑިޕްލޮމެޓުގެ ރޯލު އެމަނިކުފާނު ފުރިހަމައަށް އަދާކުރެއްވިކަމަށް ވިދާޅުވިއެވެ. ޝާހިދު ވިދާޅުވީ، ރައީސް ސާލިހުގެ ބެއްލެވުމުގެ ދަށުން ރާއްޖޭގެ ހާރިޖީ މަސައްކަތްތައްވަނީ ފުޅާވެގޮސްފައިކަމަށެވެ. އަދި އަވައްޓެރި ގައުމުތަކާއި އޮތް ގުޅުން އަލުން ދިރުވައި ބަދަހިކޮށްފައިވާކަމަށްވެސް ވިދާޅުވިއެވެ.
ޝާހިދު ވިދާޅުވީ، މިއަދު ރާއްޖެއަކީ ބައިނަލްއަގުވާމީ މައިދާނުގައި ފިޔަޖަހަމުންދާ ގައުުމެއްކަމަށެވެ. އަދި ދުނިޔެއިންވެސް ރާއްޖެއިން ހޯދާފައިވާ ކުރިއެރުންތައް ގަބޫލުކުރާކަމަށާއި އެހެންކަމުން އެ ފަންތީގެ ދައުލަތުގެ ވެރިޔަކާއިއެކު މަސައްކަތްކުރެވުމަކީ ލިބިވަޑައިގެންނެވި ޝަރަފެއްކަމަށް ވިދާޅުވިއެވެ. މިނިސްޓަރު ވިދާޅުވީ، ނަތީޖާތަކެއް ނެރުނު ސަރުކާރެއްގެ ބައެއްގެ ގޮތުގައި މަސައްކަތްކުރެއްވުމަށް ލިބިވަޑައިގެންނެވި ފުރުސަތާއިމެދު ހިތްހަމަޖެހިވަޑައިގަންނަވާކަމަށާއި، ރައީސް ސާލިހަށް ޝުކުރުވެރިވެވަޑައިގަންނަވާކަމަށެވެ.