ގައުމީ ސަލަމަތާއި ބެހޭ ބިލު ބޭރު ކުރުން: “ތިއީ ސުޕަމެޖޯރިޓީގެ ހުދުމުހުތާރުކަން”!

ރައީސުލްޖުމުހޫރިއްޔާ އިބްރާހިމް މުހައްމަދު ސާލިހުގެ ސަރުކާރުން، މަޖިލީހުގައި އޮންނަ އެމްޑީޕީގެ ސުޕަރ މެޖޯރިޓީގެ ނަހަމަ ބޭނުން ކުރަމުންދާކަމަށް ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު އާދަމް ޝަރީފް އުމަރު ވިދާޅުވެއްޖެ އެވެ.

ރައްޔިތުންގެ މަޖިލީހުގެ ތަޅުމަށް އާދަމް ޝަރީފް ހުށައަޅުއްވި ގައުމީ ސަލާމަތާއި ބެހޭ ބިލު ތަޅުމުން ބޭރުކޮށްލުމުން ކަންބޮޑުވުންފާޅުކޮސް އާދަމް ޝަރީފް ވަނީ، ސަރުކާރަށް ފާޑުކިޔުން އަމާޒު ކުރައްވާފައެވެ. އެނާ ވިދާޅުވީ، ރައްޔިތުން ކަންބޮޑުވުންތަކާއި ގައުމުގައި ހުރި ހައްސާސްކަން މަޖިލީހަށް ހުށައެޅުމުން، ސުޕަރ މެޖޯރިޓީއިން އެ މައްސަލަ ބޭރުކޮށްލުމަކީ، ހުދުމުހުތާރު އަދި ނާތަހުޒީބު އަމަލެއް ކަމަށެވެ.

Rayyithunge kanboduvunthakaai qaumugai huri hassaas kankan Majlis ah hushahelhumun super majority in e massalathah beyru kollumakee varah khodhumuhuthaaru adhi naathahuzeebu kameh! Sarukaarun dhanee super majority ge beynun nahama gothugai hifamun. pic.twitter.com/dBMlP7RtLj

— Adam Shareef Umar (@Adamshareefz) September 6, 2022

އާދަމް ޝަރީފް ވިދާޅުވީ، ރައީސް ސާލިހުގެ ސަރުކާރުން ގެންދަވަނީ، ރައްޔިތުންގެ މަޖިލީހުގައި އޮތް އެމްޑީޕީގެ ސުޕަރ މެޖޯރިޓީގެ ނަހަމަ ބޭނުންތަކެއް ކުރަމުންކަމަށެވެ. ބިލު ބޭރުވިގޮތް ސާފު ކުރުމަށް އާދަމް ޝަރީފް ވަނީ މަޖިލީހަށް ސިޓީއެއް ހުށަހަޅުއްވާފަ އެވެ.

އާދަމް ޝަރީފް ވިދާޅުވީ، މަޖިލީހަށް ހުށައަޅާފައިވާ ގައުމީ ސަލާމަތާއިބެހޭ ބިލު، ރާއްޖޭގެ އެއްވެސް ގާނޫނަކާއި ފުށޫއެރުމެއް ނެތްކަމަށެވެ. އަދި އެ ބިލާއިމެދު ވާހަކަދެއްކެވި އެއްވެސް މެމްބަރެއް އެ ބިލުގައި މައްސަލައެއް ހުރި ކަމަށް ފާހަގަކޮށްފައިނުވާކަމަށް އިޝާރާތްކުރައްވާ އެނާ ވިދާޅުވީ، އެހެންކަމުން، އެއްވެސް އަސާސެއްނެތި، އެ ބިލު ބަލައި ނުގަތުމަށް މަޖިލީހުގެ ރޫލިންގް ޕާޓިގެ އަގުލަބިއްޔަތުން ނިންމުމަކީ، މަލްޓި ޕާޓީ ސިސްޓަމުގެ ހަމަތަކާއި ބީރައްޓެހި ކަމެއް ކަމަށެވެ.

އެނާ ވިދާޅުވީ، ބިލު ބަލައި ނުގަތުމަކީ، ސަރުކާރުން، ވާދަވެރި މެމްބަރުންގެ އަޑު ކަނޑުވާލުމަށްޓަކައި ހިންގާފައިވާ ނާތަހުޒީބު އަމަލެއް ކަމަށެވެ. އަދި ވެރިކަން ކުރަމުންދާ ޕާޓީގެ ލީޑަރޝިޕަށް ގެނެސްފައިވާ ބަދަލުތަކާއިއެކު ރައްޔިތުން ކަންބޮޑުވާ މައްސަލަތައް ބަލައި ނުގަންނަކަން ފާހަގަކުރެވޭކަމަށް އާދަމް ޝަރީފް ވިދާޅުވިއެވެ.

މީގެ އިތުރުން އާދަމް ޝަރީފްވަނީ، ސަރުކާރު ޒިންމާދާރު ކުރުވުމައި ހުރަސްތަކެއް ހުރިކަމަށް އިޝާރާތްކުރައްވާފައެވެ. އަދި ސަރުކާރުން މަޖިލީހުގެ ސުޕަރ މެޖޯރިޓީގެ ނަހަމަ ބޭނުން ހިފުމަކީ، ޒިންމާދާރުކަން ކުޑަ ކަމެއް ގޮތަށް އާދަމް ޝަރީފް ސިފަކުރެއްވިއެވެ.