މަޖިލިސް ރައީސްގެ ކަންބޮޑުވުން: މުސާރަލިބޭ 87 މެމްބަރުން ތިބޭއިރު ހާޒިރުވަނީ 24 މެމްބަރުން

މަޖިލީހުގެރައީސް މުހައްމަދު ނަޝީދު މަޖިލިސް ފަށަމުން ވިދާޅުވީ އެވަގުތު މަޖިލީހަށް ހާޒިރުވެ ތިއްބެވީ 24 މަޖިލީސް މެމްބަރުން ކަމަށާއި މަޖިލީހަކީ 87 އިދާރީ ދާއިރާތަކެއްގެ މައްޗަށް އެކުލެވިގެން އިންތިހާބުކުރެވިފައި އޮންނަ މަޖިލީހެއް ކަމަށެވެ،

ރައީސް ނަޝީދު ވިދާޅުވީ މަޖިލީހުގައި ސަލާމުގައި 6 މެމްބަރުން ތިއްބެވި ކަމަށާއި  ރަސްމީ ދަތުރުފުޅުގައި މަޖިލީހުގެ 3 މެމްބަރުން ތިއްބެވި ކަމަށާއި އެހެން ކަމުން 9 މެމްބަރަކު މިވަގުތު ތިއްބެވީ މަޖިލީހަށް ވަޑައިނުގެންނެވޭ ގޮތަށް ކަމަށެވެ.

ރައީސް ނަޝީދު އިތުރަށް ވިދާޅުވީ 87 މެމްބަރުން ތިއްބަވާ މަޖިލީހެއްގައި ގަވާއިދުން މުސާރަ ލިބެމުންދާ ތަނެއްގައި، ހެނދުނުގެ ޖަލްސާ ފަށާއިރު 24 މެމްބަރުން ތިބުމަކީ އެމަނިކުފާނު ދެކިލައްވާ ގޮތުގައި މަޖިލިސް މެމްބަރުންގެ ގާނޫނީ ވާޖިބު އަދާކުރުމުގައި ފަރުވާތެރިކަން ނުބެހެއްޓެނީ ކަމަށެވެ.

ރައްޔިތުންގެ މަޖިލީހުގެ ޖަލްސާ ތަކަށް މެމްބަރުން މަދުން ހާޒިރުވާތީ ރައީސް ނަޝީދު ވަނީ މީގެކުރިންވެސް ކަންބޮޑުވުން ފާޅުކުރައްވާފައެވެ.