ސައީދުގެ ފާޑުކިއުން ސަރުކާރަށް: ދައްކަވާނެ ދުވަހެއް، ދައްކަވާފަ ގެންދަވާނީ!

އެމްޑީޕީއަށް ތިމާވެށި ފެންނަނީ ވަކި މޫސުމެއް ޖެހުމުންކަމަށް މަޖިލީހުގެ މާވަށު ދާއިރާގެ މެމްބަރު އަދި ޕީއެންސީގެ ނައިބު ރައީސް މުހައްމަދު ސައީދު ވިދާޅުވެއްޖެއެވެ.

އަމީނީ މަގު ހެދު ހެދުމުގެ މަޝްރޫއުއަށް އެ މަގުގައި ހުރި ގަސްތައް ކަނޑާ މައްސަލައިގައި، ކުރީގެ ރައީސް އަދި މަޖިލީހުގެ ރައީސް މުހައްމަދު ނަޝީދު ވަނީ ކޯޓަށް ވަޑައިގެން މަސައްކަތް ހުއްޓުވުމުގެ ވަގުތީ އަމުރަކަށް އެދިވަޑައިގެންފަ އެވެ. ރައީސް ނަޝީދު މި މައްސަލަ ކޯޓަށް ހުށަހެޅުއްވީ ގަސްތައް ކެނޑުމުގެ ސަބަބުން މޫސުމީ ބަދަލުތަކާއި ކުރިމަތިލާން ޖެހި، ތިމާވެއްޓަށް ފޫނުބެއްދޭ ވަރުގެ ގެއްލުންތަކެއް ވާނެކަމަށް ބުނެ އެވެ.

ސަރުކާރުގެ އަމަލުތަކުގެ ސަބަބުން، ތިމާވެއްޓަށް މި ނޫން ވެސް އެތައް ގެއްލުންތަކެއް ލިބިފައިވާކަން ފާހަގަކޮށް ސައީދު އެންމެ ފުރަތަމަ އިޝާރާތް ކުރެއްވީ ތިލަމާލެ ބްރިޖު މަޝްރޫއުގެ ޕްލެޓުފޯމެއް ވިލިމާލެ ފަރަށް އަރައި ލިބުނު ގެއްލުންތަކަށެވެ. ޕްލެޓްފޯމުގައި ހުރި ދަގަނޑުތަކެއްގެ ސަބަބުން ފަރުގައި ބޮޑެތި، 10 ފޫޓުގެ ބޮޑެތި ވަޅުގަނޑުތައް ވަނީ އުފެދިފަ އެވެ. އަދި އެ ގައްލުންތައް ލިބުނުތާ އެތައް ދުވަހެއް ވީއިރު އަދިވެސް އެ ަސަރަހައްދު އެއްކޮށް ސާފެއް ނުކުރެ އެވެ.

ސައީދު ވިދާޅުވީ ސަރުކާރަށް ބްރިޖެއް އެޅޭނީ ވެސް، މި ސަރަހައްދުގެ ދެ ތިން ފަރަށް ގެއްލުން ވެ ހަފުސްވުމުން ހެން ހީވާކަމަށެވެ.

ސައީދު ވިދާޅުވީ، މައްޗަށް މޫދުވާ ގަސްތަކާއި، އަރިއަޅާ ގަސްތައް އަދި މާފުންކޮށް ބިންތޮރުފާ ގަސްތައް ހުންނަކަމަށެވެ. އެހެންނަމަވެސް ދެރަކަމަކީ، އެ ގަސްތައް ހުންނަ ކަން އެނގެނީ ވަކި މޫސުމެއް ޖެހުމުންކަމަށެވެ. މިއީ ރައްޔިތުންގެ ތާއީދާއި، ސަމާލުކަން ހޯދުމަށް ރައީސް ނަޝީދު ދައްކަވާ ވާހަކަތަކެއްކަމަށް ސައީދު ތުހުމަތު ކުރެއްވި އެވެ.

ބުރިޖުވެސްއެޅޭނީ މިސަރަހައްދުން ދެތިންފަރު ހަފުސްވީމަ 🙈. މައްޗަށްމޫދުވާގަސްގަހާއި މާބޮޑަށްއަރިއަޅާގަސްގަހާއި މާފުންކޮށްބިންތޮރުފާގަސްހުރޭ.ދެރައީ ވަކިމޫސުމަކަށްފެންނާތީ!ތިމާވެއްޓަށްހަމަކޮންކްރީޓުވަރެއްނެތް! ދައްކަވާނެދުވަހެއްދައްކަވާފަގެންދަވާނީ. https://t.co/79N1f0V9kF

— Mohamed Saeed (@em_saeed) October 2, 2022

މީގެއިތުރުން ސައީދު ވިދާޅުވި، ތިމާވެއްޓަށް ކޮންކްރީޓު ވަރެއް ނެތްކަމަށެވެ. އަދި އެމްޑީޕީއަތުން ވެރިކަން ގެއްލިގެންދާނީ، އެ ޕާޓީއަށް ފެންނަން ހުރި ދުވަހެއް ފެނުމަށް ފަހުކަމަށްވެސް އެނާ ވިދާޅުވިއެވެ.

ގަސް ކަނޑާ މައްސަލައިގައި ރައީސް ނަޝީދު ވާހަކަ ދައްކަވަމުން ގެންދިޔަ ނަމަވެސް، ސަރުކާރުން ވަނީ ގަސްތައް ނުކަނޑައި އެ މަޝްރޫއު ކުރިޔަށް ގެންދެވެން ނެތްކަމަށް ބުނެފަ އެވެ. އަދި މަޝްރޫއު ނިމޭއިރު މަގުގައި ގަސްތައް ޖަހާނެކަމަށް ވެސް ވަނީ ބުނެފަ އެވެ.