ފުލުހުންނާއި ސިފައިން ގުޅިގެން ކުރިޔަށް ގެންދާ ކައުންޓަރ ޓެރަރިޒަމް އޮޕަރޭޝަނުގެ ތެރެއިން މިހާތަނަށް 13 މީހަކު ހައްޔަރުކޮށްފައިވާކަމަށް ފުލުހުން ބުނެފި އެވެ.
ބޮމުގެ އިންޒާރެއް ލިބުމުން އެންމެ އައްޑޫ އާއި މާލޭގައި ފެށި މި އޮޕަރޭޝަން ގުރައިދޫގައި ވެސް ކުރިޔަށް ގެންދިޔަ އެވެ. އަދި އޮޕަރޭޝަނުގެ ތެރެއިން ފުލުހުން ވަނީ އެ ރަށުގެ އެކި ގެތައް ބަލައި ފާސްކޮށްފަ އެވެ.
އޮޕަރޭޝަނުގެ ތަފްސީލު ހިއްސާކޮށް، ފުލުހުން މިއަދު ބުނީ މައްސަލައައި މިހާތަނަށް 13 މީހަކު ހައްޔަރުކޮށްފައިވާ ކަމަށެވެ. އެއީ އައްޑޫން ހައްޔަރު ކުރި 09 މީހަކާއި، މާލެއިން ހައްޔަރު ކުރި 02 މީހެކެވެ.
މިދިޔަ އަހަރު ރައީސް މުހައްމަދު ނަޝީދަށް އަމާޒުކޮށް އައިއީޑީއެއް ގޮއްވާލައި ދިން ހަމަލާގެ މައްސަލައިގައި ހަރުކަށީ ފިކުރާއި ދެކޮޅަށް ރާއްޖޭގެ އެކި ސަރަހައްދުތަކުގައި ކުރިޔަށް ގެންދިޔަ އޮޕަރޭޝަނުގެ ތެރެއިން އައްޑޫން ބަޔަކު ހައްޔަރު ކުރި އެވެ.